Ukraina törek xärbi oçqıçların alırğa uylıy

Ukrainanıñ Änkaradağı ilçese Vasiliy Bodnar ileneñ 5nçe buın törek xärbi oçqıçları “KAAN”nıñ motorın yasawğa öleş kertüen, kiläçäktä isä bu oçqıçlarnı satıp alırğa uylawların belderde.

Ul Törkiyädä ber telekanalğa interv’yusında älege xärbi oçqıçnıñ AQŞnıñ “F-35” häm “F-22”lärenä köndäş bula aluın belderä. Bodnar Ukrainanıñ “KAAN” oçqıçların alıp, alarnı aktiv räweştä qullanırğa planlaştıruların söyli. “Ukrainalı belgeçlär törek milli xärbi oçqıç “KAAN”nıñ motorın yasaw proyektında qatnaşa. Bu yaña närsä tügel. Motor yasaw tarmağında berniçä täcribäle şirkätebez bar”,-di ul.  

Törkiyädä 2017nçe yılda başlanğan Milli xärbi oçqıç programması qısalarında, “KAAN” oçqıçın 2028nçe yılda seriyäle citeşterügä küçü küzallana. Anıñ qayber üzençälekläreneñ “F-35”tän tağın da alğa kitkän bulaçağı häm kiläçäktä Törkiyä xärbi-hawa köçlärendä Amerikanıñ “F-16”larınıñ urının alacağı belderelä.