Törkiyä Ğazzägä mediśina xezmäte kürsätergä äzer

Törkiyä Ğazzädä yäisä Räfax çik qapqasına yaqın noqtalarda qır xastaxanäse qorırğa,  töbäkkä korab xastaxanä cibärergä äzer. Bu xaqta sälamätlek saqlaw ministrı Fäxrettin Koca belderde.  Ul sośial’ media akkauntında ministrlıqnıñ Ğazzägä mediśina xezmäte kürsätü öçen xäräkätkä küçüen, bu qısalarda xalıqara sälamätlek saqlaw oyışmaları belän söyläşülär baruın citkerde.

Ğazzädäge “Äl-Ähli” baptist xastaxanäsenä keşeleksez höcümnän soñ ministr Koca Bötendön’ya sälamätlek saqlaw oyışmasınıñ iñ yuğarı idaräçelärennän başlap bik küp xalıqara wazıyfadaşı belän telefon aşa êlemtägä kerä. Ul söyläşülärendä keşe sälamätlegenä xezmät itüçe ob’yektlarnıñ nindi şartlarda, nindi säbäp belän bulsa da höcümgä duçar qaluınıñ qabul itelmäyäçäge fikereneñ iñ töp noqta buluın assızıqlıy.

“Törkiyä regionğa korab xastaxanä cibärergä, Ğazzädä yäisä Räfax çik qapqasına yaqın urınnarda qır xastaxanäse qorırğa, fälästinle qardäşlärebezgä bolar yärdämendä sälamätlek saqlaw xezmäte kürsätergä häm anı däwam itärgä äzer,”-di ministr.

Ul Bötendön’ya sälamätlek saqlaw oyışmasınıñ Awrupa regionı mödire Xans Kluge belän söyläşüdä regionğa mediśina xezmätläre mäs’äläsendä yärdämneñ aşığıç häm ähämiyätle buluın belderde. “Bu êşçänlekne alıp baruda, ägär qarar birsä, Bötendön’ya sälamätlek saqlaw oyışması belän berlektä xäräkät itärgä bez äzer. Söyläşülärdä oyışmanıñ da bu êştä tarixi cawaplılığı buluın belderdem,”-di Fäxrettin Koca.

Ministr, diplomatik awırlıqlarğa qaramastan, Törkiyäneñ alğa taba da sabıylar, qartlar häm ber ğayepsez keşelärneñ yanında toraçağın assızıqladı.