Ärdoğan "AQ" partiyä kongressında belderülär yasadı

Törkiyä ilbaşı Räcäp Tayyip Ärdoğan terrorçı oyışmalarnı qullanıp üzlären poçmaqqa postırırğa tırışuçılarğa baş imäyäçäklären belderde. Ul başqala Änkarada üze ğomum räise bulğan ”Ğadellek häm üseş” partiyäseneñ 4nçe çirattan tış kongressı uzuçı binanıñ qarşında cıyılğan watandaşlarğa möräcäğat’ itte.

Ärdoğan firqaseneñ 22 yıllıq tarixında 17nçe saylawda (may ayındağı ğomumi saylawlar) ciñüen xäterlätte häm, törle awırlıqlar belän oçraşsalar da, Törkiyäne maqsatlarına iltüdä täwäkkäl buluların assızıqladı.

“Bezne qurqıtırğa tırışuçılarğa iğ’tibar itmibez. Kesäsennän yodrıq bolğawçılarnñ süzenä qaramıybız. Terrorçı oyışmalarnı qullanıp bezne poçmaqqa qısrıqlarğa mataşuçılarğa baş imibez. Törkiyäneñ mänfäğat’läre häm iminlege öçen närsä kiräk bulsa, şunı êşläwdän berqayçan da tayçanmıybız”, - dide ilbaşı.

Ärdoğan Kongresstağı çığışında isä bolay dip söyläde: “Terrorçılarnı oyasında yuq itü strategiyäbezne qararlılıq belän başqaraçaqbız, “PKK”, “FETO” häm “DEAŞ” tükkän här tamçı qan öçen cawap biräçäk. “Ber töndä kötmägändä kiläçäkbez” digän kisätüneñ watanıbıznıñ yäşäyeşenä qul suzuçı qabaxätlärneñ yöräklärenä salğan qurqunı kimetmäyäçäkbez. Yaqın Könçığıştan Qavqazğa, Balkannan Qara diñgezgä qadär töbäktä aqqan qannıñ tuqtatıluı östenlekle kön tärtibebezdä”.