AQŞ astronavtı törek yäş'lärenä xäyran qaldı

İzmirdä oyıştırılğan dön’yadağı iñ zur Aviaśiya, ğaläm häm texnologiyä festivale “TEXNOFEST”ta qatnaşqan Amerika astronavtı Doroti Metkalf-Lindenburg törek yäş’läreneñ ğaläm belän qızıqsınuına tañ qaldı. Ul Çiğli aêroportında uzuçı çaranıñ soñğı könendä “Astronavtlar söyli: şaqqattırğıç xikäyälär” dip ataluçı äñgämädä qatnaştı. Metkalf-Lindenburg anda yäş’lärneñ sorawlarına cawap birde. Ul 2004nçe yıldan 2014nçe yılğa qadär astronavt bularaq wazıyfa başqaruın, ğalämgä oçunıñ iñ qızıqlı yağınıñ annan Cirne kürü ikänen söyläde.

Amerika qunağı “TEXNOFEST” festivalendä berençe tapqır qatnaşuın äytte. “Monda kilüçeneñ küplege mine şaqqattırdı. Yäş’lärne, balalarnı, ğailälärne, universitet studentların, xärbilärne kürep, çınnan da, xäyran qaldım. Söyläşkändä östebezdän iskitkeç oçqıçlarnıñ ütüen işettem. Bu çınnan da täêsirle,”-dip söyläde ul.

Metkalf-Lindenburg törek yäş’läreneñ ğaläm häm aviaśiya belän bik nıq qızıqsınuın kürüen belderde.

“Törek yäş’läre bik belemle häm qızıqsınuçan. Bik şäp fikerläre bar. Alar ğalämgä ber astronavtnı cibärergä äzer. Törkiyäneñ aviaśiya häm ğaläm industriyäsenä yuğarı däräcädä qatnaşuınıñ däwam itäçägen beläm. “TEXNOFEST” monı mömkin qıluçı moxit barlıqqa kiterä,”-dip söyläde Amerika astronavtı Doroti Metkalf-Lindenburg.