Ärdoğan Şeraton Konkordiya sammitında sorawlarğa cawap birde

Türkiyä ilbaşı Räcäp Tayyip Ärdoğan N’yu-Yorkta Şeraton Konkordiya sammitı qısalarında sorawlarğa cawap birde.

“NATO äğ’zası häm Amerika Quşma Ştatlarınıñ strategik xezmättäşe bularaq milli mänfäğat’lär häm tağın da kiñräk geosäyäsi kiyerenkeleklär arasında niçek yul tabasız?” digän sorawğa ul, Türkiyäneñ xärbi köçe häm finans kerteme belän ittifaq’tağı berençe 5 ildän berse buluın xäterlätep, bolay dip cawap birde: “NATO êçendä bilgele urınıbız bar. Moña qadär älege mäs’älädä hiç artqa çigenmädek. NATOdağı bu köçebez ittifaq äğ’zası illär arasında da yuğarı bäyälänä”.  

Ärdoğan Türkiyäneñ NATOdağı wazıyfaların härwaqıt cirenä citkerep ütäwçe däwlät buluın häm monnan soñ da şulay bulaçağın assızıqladı.

İlbaşı, tağın ber sorawğa cawap birep, Farsı qultığın Awrupa belän bäyläwe uylanıluçı Türkiyä-Ğıyraq üseş yulı proyektı xaqında da fikerlären citkerde.  

“Barınnan da bigräk, bu -Farsı qultığınnan häm andağı illärne kiçep Ğıyraqtan uzıp Türkiyä aşa Awrupağa taba suzıluçı koridor. Anda rel’slı sistemalar, avtoyullar, alarnıñ asqorması, ösqorması bulaçaq. Biredä Farsı qultığı illäreneñ dä teläge zur buluın kürdem. Berläşkän Ğaräp Ämirlekläre bulsın, Katar bulsın, Soğud Ğaräbstanı, Ğıyraq bulsın – barısınıñ da bu mäs’älädä qararı nıq. Şul isäptän bezneke dä,”-dip söyläde Türkiyä liderı. Ul älege proyekt belän yaña mömkinleklär açılaçağına häm yaña dön’ya tözeläçägenä basım yasadı.