Fidan: “İslam dönyası protest qararların qabul itäçäk”
Türkiyä (Төркия) Tışqı êşlär ministrı Xaqan Fidan Qor’ängä höcümnär belän bäyle bularaq İslam dönyasınıñ 31nçe iyül’dä protest qararların qabul itäçägen äytte
Fidan räsmi säfär belän kitkän Vengriya (Macarstan) başqalası Budapeştta Vengriya (Macarstan) tışqı êşlär häm säwdä ministrı Peter Siyarto belän urtaq matbuğat oçraşuın oyıştırdı.
Ministr Fidan biredä yasağan belderüendä, Awrupada Qor’än-ı Kärimgä qarşı höcümnärgä tuqtalıp uzıp: "Awrupada böten närsä kitap yandıru belän başlandı. Kitapnı yandırudan soñ konślagerlar (концлагерьлар), annan soñ närsä buluın beläbez”, - dide.
Fidan: "(Awrupada Qor’än-ı Kärimgä höcümnär) Bez bu êpidemiyanı mömkin qadär iñ kisken räweştä gäyıplibez. Bez xalıqara aktyorlar, İslam illäre belän citdi söyläşülär alıp barabız. 31nçe iyül’dä İslam xezmättäşlek oyışmasınıñ tışqı êşlär ministrları cıyılışı bar. İslam dönyası protest qararların qabul itäçäk”, - dip äytte.
Siyarto da: "Bez böten izge bilgelärgä häm simvollarğa qarşı qırıslıqnı gäyıplibez. Dinnärgä qarşı bernindi mısqıllaw qabul itelä alınmıy ", - dip fikeren belderde.
Siyarto: "Bez xristian ile. Bezneñ cähättän teläsä qaysı dinneñ kitabın mısqıllaw qabul itelmi”, - dip äytte.
Macarstan (Vengriya) tışqı êşlär ministrı ayıruça: "Bu yaña çorda Türkiyäneñ role tağın da zurraq. Barı tik Vengriya (Macarstan) öçen genä tügel, Awrupanıñ iminlege cähätennän dä ähämiyäte bik zur”, - dip basım yasadı.
