Төркия, Швеция һәм НАТО очрашуы / Türkiyä, Şveśiya häm NATO oçraşuı
Türkiyä (Төркия) tarafınnan NATO äğ’zalege xuplanaçaq Şveśiya (Швеция) Tamğaxanä (tamojnya) berlegeneñ yañartıluı häm vizadan azat itü belän bergä Türkiyäneñ Awrupa Berlegenä äğ’za bulu barışın aktiv räweştä (рәвeштә) yaqlayaçaq
Türkiyä İlbaşı Räcäp Tayyip Ärdoğan kiçä Şveśiya (Швеция) Baş ministrı Ulf Kristersson häm NATO Ğomum särkätibe Yens Stoltenberg belän Litva başqalası Vil’nyustağı (Vilniustağı) NATO sammitında oçraştı.
Türkiyä, Şveśiya häm NATOnıñ öç yaqlı oçraşuınnan soñ yasalğan yazmaça belderüdä Türkiyäneñ Şveśiyanıñ NATOğa quşıluı protokolların Törkiyä Böyek Millät Mäclesenä tapşıraçağı, Şveśiyanıñ da Türkiyäneñ Awrupa Berlegenä äğ’zalek barışınıñ canlandırıluı mäs’äläsendäge tırışuların yaqlayaçağı citkerelde.
Türkiyä belän Şveśiyanıñ häm 2022nçe yıldağı Madrid NATO sammitında tözelgän Öç yaqlı daimi urtaq mexanizm häm dä ministr däräcäsendä yılda ber tapqır cıyılaçaq häm yaraşlı êş törkemnären buldıraçaq yaña ike yaqlı İminlek mexanizmı qısalarında xezmättäşlekkä däwam itü mäs’äläsendä kileşüe äytelgän belderüdä:
"İminlek komitetınıñ berençe cıyılışında Şveśiya terrorçılıqnıñ böten törläre häm küreneşläre belän köräşneñ nigeze bularaq Öç yaqlı memorandumnıñ 4nçe mäddäse belän bergä böten êlementlarnıñ tulısınça tormışqa aşırıluına qağılışlı yul kartasın täq’dim itäçäk. Şveśiya “YPG/PYD” häm Türkiyädä “FETÖ” dip bilgele bulğan oyışmağa bulışmayaçağın qabat raslıy. Türkiyä häm Şveśiya terrorçılıq belän köräş xezmättäşlegeneñ Şveśiyanıñ NATOğa kerüennän soñ da däwam itäçäk ozaq möddätle tırışlıq buluı mäs’äläsendä urtaq fikerdä”, - dip äytelde.
Türkiyä belän Şveśiyanıñ Türkiyä-Şveśiya urtaq iq’tisad häm säwdä komitetı (JETCO) aradaşçılığı belän iq’tisadi xezmättäşlekne arttıru mäs’äläsendä dä kileşügä ireşüe citkerelgän belderüdä taraflarnıñ ike yaqlı säwdäne häm investiśiyälärne arttıru mömkinlekläreneñ yulların êzläyäçägenä basım yasaldı.
Belderüdä: "Şveśiya Türkiyäneñ Türkiyä-Awrupa Berlege Tamğaxanä (tamojnya) berlegeneñ yañartıluı häm vizadan azat itelüe belän ber rättän Awrupa Berlegenä äğ’zalek barışınıñ yañadan torğızıluı tırışuların aktiv yaqlayaçaq. Şuşı nigezdä häm Awrupa-Atlantika töbägeneñ tıyıp toru häm saqlanu zaruriyätläre qısalarında Türkiyä Şveśiyanıñ quşılu protokolların Törkiyä Böyek Millät Mäclesenä tapşıraçaq häm raslanuınıñ täêmin itelüe öçen parlament belän yaqın xezmättäşlek êçendä bulaçaq”, - dip iskärtelep uzıldı.
