Xaqan Fidan Qaratawda

Türkiyä tışqı êşlär ministrı Xaqan Fidan Kön’yaq-Könçığış Awrupa xezmättäşlege prośessı sammitında qatnaşu öçen Qaratawğa (Montenegroğa) kitte. Ul anda Törek säwdä palatasınıñ açılışında qatnaşıp çığış yasadı.

Fidan Türkiyäneñ Qarataw belän tarixi, gumanitar, säyäsi häm mädäni bäyläneşlärgä iyä buluın assızıqlap, älege bäyläneşlärneñ iq’tisad tarmağında da torğan sayın nığuın äytte. “Bıyıl axırına 250 million dollarlıq säwdä äyläneşe maqsatıbızğa ireşüne küzallıybız,”- dide ul.

Mimistr Qaratawda, ayıruça, ênergetika, turizm, asqorma, mäğarif, sälamätlek saqlaw, awıl xucalığı, êlemtä häm informatika tarmaqlarında investiśiyä mömkinlekläre barlığın citkerde.

Xaqan Fidan grajdanlı aviaśiya alanında da xezmättäşlekne tiränäytülären, Törek hawa yullarınıñ atnalıq reysların 14tän 17gä citkerüen häm törle illärneñ 100 meñnän artıq turistın Qaratawğa iltüen, "Pegasus" şirkäteneñ dä 19nçı iyül’dän säfärlären başlayaçağın söyläde.

Tışqı êşlär ministrı, êşlekle säfäre qısalarında, Qarataw xökümäte räise urınbasarı häm Bosniya partiyäse ğomum räise Ärvin İbrahimoviç belän oçraştı. Ministrlıqnıñ Twitter akkauntında älege küreşü turında bolay diyelä: “Ministrıbız Bosniya partiyäsen tarixi saylaw uñışı öçen täbrik itte, Qaratawdağı bosniyäle qardäşlärebezgä alğa taba da teräk bulaçağıbıznı assızıqladı”.

Xaqan Fidan Qorban Bäyräme uñayınnan Qarataw İslam xezmättäşlege räise Rifat Feyziç citäkçelegendä başqala Podgoriśeda oyıştırılğan qabul itü çarasında da qatnaştı.