Ärdoğan Türkiyäneñ täwge ğaläm yulçıların atadı

Türkiyä ilbaşı Räcäp Tayyip Ärdoğan Türkiyäneñ täwge ğaläm yulçıların iğ’lan itte. Ul Azärbaycan ilbaşı İlham Äliyev, Liviyä xökümäte räise Abdulxämit Dibäybä belän İstanbulnıñ Atatörek aêroportında oyıştırılğan “TEKNOFEST” festivalendä qatnaşıp çiğiş yasadı.

Ärdoğan berençese 2018nçe yılda uzğan “TEKNOFEST”nıñ üz mäydanında brendqa äwerelüen, çarağa bıyıl 81 töbäk häm 96 ildän 333 meñ komanda häm 1 millionnan artıq yarışuçı möräcäğat’ itüen citkerde.

İlbaşı Türkiyäneñ keşele täwge ğaläm säfäre turında da süz quzğattı. Ul ike ğaläm yulçısınıñ bilgelänüen, alarnıñ berseneñ – töp, ikençese almaş buluın söyläde. Ğalämğä oçaçaq keşe xalıqara ğaläm stanśiyäsendä 14 kön torıp 13 törle täcribä ütkäräçäk.

Ärdoğan älege yulçınıñ ğalämgä çığu waqıtınıñ bıyılnıñ axırğı çiregenä planlaştırıluın belderde.

“Xalıqara ğaläm stanśiyäsenä kitäçäk Alpär Gäzäravcı qardäşebez xärbi-hawa köçläre komandalığında ähämiyätle uñışlarğa ireşkän kaharman törek oçuçısı, Tuva Cihangir Atasävär qardäşebez isä “Roketsan”da êşläwçe sistema injenerı,”-dip söyläde ilbaşı.

Azärbaycan liderı İlham Äliyev üz çığışında Türkiyäneñ regionda tınıçlıqnıñ, totrıqlılıqnıñ häm iminlekneñ garantiyäse buluın, zur törki dön’yanıñ berläşüe öçen möhim rol’ uynawın söyläde. Ul, şulay uq, ilneñ Awraziyädäge säwdä, ênergetika, transport, säyäsät märkäse buluın, saqlanu sänäğateneñ bügen böten dön’yada qabul itelüen äytte.

Liviyä xökümäte räise Dibäybä dä Türkiyäneñ bügen unışlı däwlät modeleneñ iñ kürenekle misalı buluın belderde. “Barlıq qatnaşuçılarğa Liviyäneñ hawa saqlanu sistemalarınıñ köçäytelüenä kertkän öleşläre öçen ayırım räxmät belderäm,”-dide ul.