“Ğasır berdämlege” kampaniyäse başlandı

Türkiyä ilbaşı idaräseneñ êlemtä bülege 6nçı fevral’dä Kaxramanmaraş êpiśentrlı cir teträwlärdän soñ kürsätelgän berdämlekkä iğ’tibarnı cälep itü maqsatınnan “Ğasır berdämlege” kampaniyäsen başlap cibärde.

Êlemtä bülege belderüendä äytelgänçä, “Bez bergä Türkiyä” şiğare belän başlanğan kampaniyädä cir teträwlärdän zıyan kürüçelärgä yärdäm itü öçen alıp barılğan êşçänleklärgä basım yasala, ğasır fäläkätendä däwlät häm millät berdämlegeneñ möhimlege assızıqlana.

İlbaşı idaräseneñ êlemtä bülege başlığı Fäxrettin Altun 6 nçı fevral’däge cir teträwlärneñ 14 million keşegä turıdan - turı täêsir itüen, zur cimerülär häm ğazaplar kiterüen belderde.

Ul ğasır äfäteneñ başınnan birle däwlät häm millätneñ ber yöräk bulıp êş itüen assızıqlap bolay dide: “İlbaşı Räcäp Tayyip Ärdoğan citäkçelegendä barlıq oyışmalarıbız êzläw-qotqaru häm yärdäm kürsätü öçen töbäktä mobilizaśiyäländelär. Cir teträw töbägendäge qardäşlärebezneñ olı qayğı-xäsräten kimetü, alarğa yärdäm qulı suzu häm fäläkätneñ ayanıç näticälärenä qarşı qatğıy räweştä köräşü maqsatınnan däwlätebez häm xalqıbız böten dön’yağa ürnäk bulğan ğasır berdämlegen kürsättelär. Bez bu berdämlek ruxın tağın da nığıtaçaqbız. Bu awır könnärne uzdırıp cibärü öçen, yaralarnı sawıqtıru, watandaşlarıbızn yaña öylärenä urnaştıru, töbäkne qabat torğızu öçen köne-töne bar köçebezgä êşläyäçäkbez”.