Ärdoğan: “Cimerelgän şähärlärne ber yıl êçendä torğızunı maqsat itäbez”

İlbaşı Ärdoğan İstanbulda 26nçısı oyıştırılğan Awraziya iq’tisad sammitına yullama cibärde.

Ärdoğan, yuğarı däräcäle oçraşunıñ Türkiyäneñ millät bularaq keşelek tarixınıñ iñ zur afätlärennän berse belän teträngän waqıtta uzuın belderep: "6nçı fevral’da yäşängän 7,7 häm 7,6 zurlığındağı Kahramanmaraş êpiśentrlı cirteträwlär 11 vilayätäbezgä, 14 million keşebezgä turıdan-turı täêsir itte. 48 meñnän kübräk watandaşıbıznıñ ğomere özelgän şuşı cirteträwlärdä ilebez iq’tisadı bik citdi yara aldı. Cirteträwneñ berençe mizgelendä bez başlatqan mobilizaśiyanı êş dönyabıznıñ yärdäme belän dä törle ölkälärdä däwam itteräbez,” – dide.

İlbaşı Ärdoğan ber yıl êçendä asqorması, infrastrukturası häm superstrukturası belän cimerelgän böten şähärlärne yañadan torğızunı maqsat itülärenä basım yasadı.

Bu barışta däwlätneñ bäyläneşle oyışmaları belän bergä êş dönyasına da bik möhim wazıyfalar häm cawaplılıqlar turı kilüenä işarät itüçe Däwlät başlığı Ärdoğan:

"Êşmäkärlärebezdän häm êş urınnarın, êşxanälären saqlap qaluın häm dä qullarındağı böten mömkinleklärne cirteträwdän zıyan kürüçelär öçen mobilizaśiyäläwen kötäbez. Däwlät häm millät bularaq qulğa-qul totışıp bu awır imtixannı däräcäle räweştä birä alaçağıbızğa ışanam,” – dip äytte.

İlbaşı Türkiyäneñ êş belän täêmin itüenä, êksportına, üseşenä häm citeşterüenä öleşläre öçen êşmäkärlärgä räxmät äytte.