Cir teträwlärneñ zıyanı 100 milliard dollardan artıq

BMO Türkiyädä 6nçı fevral’däge Kaxramanmaraş cir teträwläre kiterep çığarğan zıyannıñ 100 milliard dollardan artıq buluın farazladı

Berläşkän Millätlär oyışması Üseş programmasınıñ Türkiyädäge daimi wäkile Luiza Vinton Jeneva ofisında uzğan atnalıq matbuğat cıyılışında Gaziantäptän videoêlemtä aşa qatnaştı. Ul cir teträwlärdän soñ 1 ay uzuın, zilzilä arqasında töbäktäge 2 million 700 meñ keşeneñ küçenep kitärgä mäcbür buluın, 600 meñgä yaqın bina yäisä êş urınınıñ cimerelüen belderde.  

“Moña qadär yasalğan isäpläwlär belän xökümät beldergän häm xalıqara xezmättäşlär dä raslağan zarar summasınıñ 100 milliard dollardan artaçağı farazlana,”-dide Vinton.

Wäkil afät masştabınıñ moña qadär kürelmägän däräcädä buluın belderde.  “Xaräbälär astında keşelärneñ öyläre, xıyalları, istälekläre, bar närsäse qaldı. Şulqadär zur afät ki, 100 million kubometr cimerek barlıqqa kiterde häm bu bik zur küläm,”-dide ul.   

Vinton xalıqara cämäğat’çelekkä yullama da yasadı. “Bu hälakätneñ niqadär zur buluın añlatırğa telibez. BMO ğomum särqatibe Antonio Guterriş tä äytkän şikelle, Türkiyäneñ yıllar buyı süriyälelärgä kürsätkän yumartlığın xäzer Türkiyägä kürsätü waqıtı. Bu barı töbäktäge fizik asqormanı qabat tözüne finanslaw yäisä bulışu ğına tügel, keşelärneñ ğadäti tormışqa kire qaytuı öçen dä bik ähämiyätle. Töbäkneñ qabat torğızıluına teräk bulu öçen bik küp finans mexanizmnarı bar”-dide Berläşkän Millätlär oyışması Üseş programmasınıñ Türkiyädäge daimi wäkile Luiza Vinton.