Ärdoğan belän Makron videoêlemtä aşa söyläşte
Söyläşüdä Türkiyädäge cir teträwlär häm Ukrainadağı suğış qaraldı
Türkiyä ilbaşı Räcäp Tayyip Ärdoğan Franśiyä däwlät başlığı Êmmanuêl’ Makron belän videoêlemtä aşa söyläşte.
İlbaşı apparatı êlemtä bülegennän yasalğan belderügä qarağanda, Makron äñgämä waqıtında Türkiyädä 6nçı fevral’dä bulğan cir teträwlär nisbätennän teläklären citkerde. İlbaşı Ärdoğan bu awır waqıtta Franśiyä kürsätkän teläktäşlek häm yärdäm öçen räxmät äytte.
Söyläşüdä Türkiyä-Franśiyä mönäsäbätläre belän bäyle mäs’älälär dä qaraldı.
Êmmanuêl’ Makron videoêlemtädän soñ Twitterda törek telendä belderü yasadı.
Ul Kaxramanmaraştağı cir teträwlärdän soñ Franśiyä grajdanlı iminlek köçläreneñ töbäkkä barıp êzläw-qotqaru êşlärendä qatnaşuın xäterlätte häm älege qısalarda Adıyamandağı Gölbaşı rayonında franśuzlar qorğan qır xastaxanäsendä här kön 100 yaralınıñ däwalanuın äytte. “Xäzer dä tulısınça mobilizaśiyälänüebezne häm yärdämläşüdä buluıbıznı ilbaşı Ärdoğanğa rasladım,”-dide Makron.
Franśiyä liderı ilbaşı Ärdoğan belän Ukrainadağı suğış turında da fikerläşülären belderde.
“Ukrainanıñ ciñüen täêmin itü öçen yärdämebezne tağın da köçäytergä kiräk. Höcümnärdän tuqtatu öçen isä Rusiyägä basımnı arttıru zarur,”-dide ul.
