5nçe täwlektä dä söyeneçle xäbärlär
Türkiyädä afät bulğan töbäklärdä êzläw-qotqaru êşläre däwam itä
Êzläw-qotqaru törkemnäre Türkiyäne tirän xäsrätkä kümgän cir teträwneñ 5nçe könendä dä cimereklär astınnan isän-saw qotıluçılar tuırında xäbärlär belän söyenderä.
Xatayda işelgän binanıñ astınnan 105nçe säğat’tä yäş’ yarımlıq bäbäy belän 7 yäşendäge abıysı çığarıldı.
Xataynıñ Antakiya rayonında 6 qatlı yortnıñ xaräbälärennän 103 säğat’tän soñ qotqaru törkemnäreneñ tawışına cawap birgän “Venüs” isemle êt belän anıñ xucası çığarıldı. Monnan alda älege rayonda 102 säğat’tän soñ 32 yäşendäge ber keşene, 101 säğat’tän soñ 30 yäşendäge Xikmät Yiğitbaşnı, 36 yäş’lek xatın-qıznı häm 8 yäş’lek bala belän ätisen isän kileş qotqarğannar ide.
İskändärun rayonında 5 qatlı yortnıñ cimereklärennän cir teträwdän soñ 102 säğat’ uzğaç 6 keşelek ğailä çığarıldı.
Kaxramanmaraşta 104 säğat’tän soñ xaräbälärdän çığarılğan 41 yäş’lek keşe üzen qotqarğan törkemdäge xärbineñ qullarınnan üpte. Ber binanıñ cimereklärennän afättän 102 säğat’ uzğaç ber bala belän änise, 103 säğat’tän soñ 15 yäş’lek qız bala çığarıldı.
Diyarbakırda 101 säğat’tän soñ änise belän ulı isän-saw tabıldı.
Kaxramanmaraşta 101 säğat’tän soñ 28 yäş’lek universitet uquçısı, 99 säğat’ uzğaç - 2 qız tuğan çığarıldı.
Xatayda 10 könlek bäbäy belän änise cir teträwdän yaqınça 90 säğat’ uzğaç, tağın yäş’ yarımlıq Sela isemle bala belän anıñ 4 keşelek ğailäse 96 säğat’tän soñ isän-saw çığarılğan ide.
Gaziantäptä xaräbälär astında qalğan 17 yäş’lek Adnan Korkut 94 säğat’tän soñ qotqarıldı.
