Türkiyä parlamentı başlığı Şäntop Aljirda

Oçraşuda Törkiyä-Aljir mönäsäbätlärendä qısqa waqıtta ireşelgän alğarışlardan şat buluın belderüçe Şäntop: "Mönäsäbätlärebezneñ ışanıç, ike yaqlı añlayış häm urtaq mänfäğätlär qısalarında üseş aluı – töbägebezneñ totrıqlılığı häm mullığı cähätennän dä bik zur ähämiyätkä iyä,” – dip äytte.

İSİPAB cıyılışınıñ İslam dönyasınıñ urtaq problemaları quzğatılğan möhim platformalarınnan berse buluın bilgeläp uzuçı Parlament başlığı Şäntop dönyanıñ dürt ber yağında İslam illärennän çittä yäşäwçe 400 million möselmannıñ sistemalı yäki individual’ keşe xoquqların bozu oçraqlarına duçar buluın äytte.

Törkiyäneñ İSİPAB çirattağı räislege qısalarında tözelüen täêmin itkän "Möselman cämğıyätlär häm azçılıqlar komitetı”nıñ başqarğan êşçänlege näticäsendä kiñ qırlı xisap äzerläwen belderüçe Şäntop bolay dip iskärtep uzdı:

“İSİPAB äğ’zase bulmağan illärdä möselmannarğa qarşı ksenofobiya, diskriminaśiya häm näfrät cinayätläreneñ citdi räweştä artuı häm waqıt waqıt däwlät säyäsäte bularaq xuplanıluı bilgelängän ide. Monnan soñğı barışta bu Komitet İSİPAB äğ’zase bulmağan illärdäge möselman azçılığı häm cämğıyätläreneñ keşe xoquqların bozu oçraqları xisabın äzerläyäçäk, monıñ öçen törle êşçänlek, tikşerenülär häm urınnarğa säfär yasalaçaq.

Komitetnıñ berençe xisabınıñ äzerlekläre qısalarında Könbatış Awrupa illärennän möselmannar küpläp yäşäwçe Germaniya häm Franśiya häm şulay uq möselmannar azçılıqta bulıp citdi xoquq bozularğa duçar bulğan M’yanma misalları östendä êşçänlek alıp barıldı. Könbatış illäre möselmannar turında süz barğanda ikeyözle totış belän şäxsän üz qıymmätlären häm normaların kürmämeşkä salışa. Xisap bu xaqıyqätlärne kürsätü cähätennän şaqtıy qıymmätle bulaçaq."

Şäntop räsmi oçraşuları qısalarında Kot-d İvuar cömhüriyäte Milli Mäclese başlığı Adama Biktogo häm yanındağı wäkillek belän dä küreşep söyläşte.

Şäntop oçraşu waqıtında, ike il arasındağı mönäsäbätlärne arttıru täwäkkällegen citkerep, bigräk tä ênergetika, sälamätlek saqlaw, mäğarif ölkälärendä xezmättäşlekneñ üsterelä alınaçağına basım yasadı.

Oman soltanlığı Şura Mäclese başlığı Halid Bin Hilal äl-Mävali belän dä oçraşqan Şäntop, soñğı waqıtta mönäsäbätlärneñ üseşennän qanäğät buluın belderep, Törkiyä belän Omannıñ şaqtıy regional’ mäs’älädä oxşaş qaraşlarnı urtaqlaşuın äytte.