Litva İlbaşı Türkiyä belän mönäsäbätlärgä bäyä birde

Litva İlbaşı Nauseda Bötendönya iq’tisad forumında qatnaşu öçen kitkän Şveyśariyanıñ Davos qasabasında “Anadolu” agentlığına bäyäläwlär yasadı.

Türkiyä belän xärbi ölkädäge xezmättäşlekne üsterüneñ möhim buluına tuqtalıp uzuçı Nauseda kiläçäktä bik küp törle ölkädä tağın da kiñ qolaçlı urtaqlıqlarnı küzallawın belderde.

Nauseda: "Törek duslarıbız belän bik yaxşı xezmättäşlegebez bar. İlbaşı Räcäp Tayyip Ärdoğan belän bik yaxşı şäxsi mönäsäbätem bar häm iyül’däge NATO sammitında üzen Vil’nusta qunaq itüne sabırsızlıq belän kötäm. Türkiyä – NATOnıñ bik möhim äğ’zase,” – dip äytte.

Rusiyä-Ukraina suğışı arqasında dönya külämendä yäşängän azıq-tölek krizisında Türkiyäneñ aradaşçılıq role turında da maqtaw süzlären citkerüçe Nauseda: "Türkiyäneñ Ukraina aşlığın bik küp ilgä êksportlayaçaq kanallarnı tabu tırışlığın çınnan da täq’dir itäm, Türkiyäneñ azıq-tölek qurqınıçsızlığına öleş kertüen däwam itüen ömet itäm,” – dide.

Rusiyä-Ukraina suğışında Ukrainanıñ yağında buluların, xökümät programmasınnan tış Litva xalqınıñ da Ukrainağa yärdäm öçen köräş alıp baruın belderüçe Nauseda litvalılarnıñ Ukrainağa “Bayraktar TB2” satıp alu öçen kampaniya oyıştıruın, “Baykar teknologiya”nıñ da “Bayraktar TB2”ne Litvağa buşlay birüen xäterlätte.