İspaniyälelärneñ Türkiyä belän qızıqsınuı artqan

Törek serialları häm sälamätlek turizmı täêsirendä ispannarnıñ Türkiyä belän qızıqsınuı uzğan yıl belän çağıştırğanda yaqınça 4 tapqırğa artqan.

Uzğan yıl Türkiyägä kilgän ispaniyäle sanı 75 meñ bulğan bulsa, bıyılnıñ ğıynwar-oktyabr’ aylarında alarnıñ sanı 255 meñgä citkän, yıl axırına bu san 300 meñgä citär dip kötelä.

İspannarnıñ Türkiyäne möhim yünäleş itep kürä başlawında törek seriallarına östäp sälamätlek turizmı da näticäle bulğan.

”Törek hawa yulları” aviakompaniyäseneñ Madrid direktorı Numan Çizmäcioğlu äytüençä, Türkiyä serialları İspaniyädä bik populyar.

Çizmäcioğlu:” Bez törek seriallarına qarata qızıqsınunıñ ni däräcädä buluın üzebezneñ tarmaqta da kürdek. İspaniyälelär bezdän Türkiyä turında mäğ’lümat alğanda yäki bilet satıp alğanda “Bu seriallar qayda töşerelgän? Bez anda bula alabızmı?” kebek sorawlar birälär. Qayber agentlıqlarnıñ İspaniya turistların Türkiyädä serial töşerelgän urınnarğa alıp baruların işetäbez”,- dide.

Numan Çizmäcioğlu sälamätlek turizmınıñ berençe êtapta çäç küçerü belän başlawın äytte.

”İspaniyälelär öçen çäç küçerüdä Türkiyä bazarı bik populyar buldı. Şul uq waqıtta alar Türkiyädä sälamätlek saqlaw xezmätläreneñ bik sıyfatlı buluın häm alarğa arzanrak bäyälär birelüen añladılar. Xäzerge waqıtta alar teş, küz, plastik operaśiyälär öçen Türkiyägä kilälär. Bu bazar alğa taba üsäçäk”,- dide ”Törek hawa yulları” aviakompaniyäseneñ Madrid direktorı Numan Çizmäcioğlu.