Ärdoğan: “Düşämbe könne yaña söyıneçebezne millätebez belän urtaqlaşırbız”
İlbaşı Räcäp Tayyip Ärdoğan Türkiyäneñ Azärbaycan belän bergä töbäktä yaña çornıñ nigezlären saluın, Ärmänstannıñ aqıl belän êş itep tınıçlıq, iminlek, xozur yünäleşendä alğa baruı belän töbäktä êşlärneñ tağın da tizlänäçägen äytte
Ärzurumda kümäk açılış tantanasında qatnaşqan İlbaşı Ärdoğan, Qara diñgezdä tabılğan gaznı milli sistemağa totaştıru öçen köne-töne êşläwlären belderep: "Düşämbe könne bu mäs’älädä yaña söyıneçebezne millätebez belän urtaqlaşırbız. Qara diñgez gazın qullanuğa täq’dim itkännän soñ da bez millätebezgä biräçäk yaña söyıneçlär bulaçaq,” – dip äytte.
Ärdoğan Türkiyäne Aziya geografiyasınnan Awrupağa cäyılgän neft’ häm tabiğıy gaz ütkärgeçläreneñ häm taratu häm säwdä üzägenä äyländerü tırışlıqlarınıñ iñ kritik stanśiyälärennän berseneñ dä Ärzurum buluın belderde.
Töbäk potenśialın êffektiv räweştä qullana alunıñ aldındağı iñ zur kirtä bulğan Qavqazdağı bäreleşlärne häm kiyırenkeleklärne ber-ber artlı xäl itülären añlatuçı Ärdoğan:
"İlebezneñ yärdäme belän Qarabaxnı yawdan azat itkän Azärbaycanlı qardäşlärebez belän bergä bu töbäktä yaña çornıñ nigezlären salabız. Ärmänstannıñ aqıl belän êş itep tınıçlıq, iminlek, xozur yünäleşendä alğa baruı belän êşlär tağın da tizlänäçäk. Qara diñgezne Ärzurumğa totaştırğan tunnellär häm yullar, Urta diñgez portların Qavqaz belän bötenläştergän asqorma investiśiyälärebez härwaqıt şuşı zur forsatnı qullana alu öçen,” – dip äytte.
