Ärdoğan: "Bu sśenariy monnan arı êşlämäyäçäk"

Türkiyä ilbaşı Räcäp Tayyip Ärdoğan terrorçı oyışmalarğa yärdäm kürsätüçelärgä rizasızlıq belderep: “Qayberäwlär äle haman çiklärebezne tınğısızlap, terrorçı oyışmalarnı ilebezgä österep êlekkege waqıtlarnı tereltergä mataşsa da, bu sśenariy monnan soñ êşlämäyäçäk,”-dide.

Ärdoğan başqala Änkarada ilbaşı rezidenśiyäsennän turıdan-turı videoêlemtä aşa Bitlis töbägendäge yul açılığı tantanasında qatnaştı.  

“Terrornıñ külägäsen Bitlis şähärebez östennän yıraqlaştırıp niçek iminlek häm tınıçlıqnı torğızsaq, bu tör asqorma investiśiyäläre belän üseş maqsatlarıbız qarşındağı kirtälärne dä yuq itäbez,”-dide ilbaşı. Ul Türkiyäneñ könüzäge sıman uq Bitlisneñ könüzägeneñ dä alğa kitkän citeşterü häm üskän mullıqqa nigezlänep formalaşaçağın assızıqladı.  

“Uzğan 20 yılda ilebezgä kitergän demokratiyä häm üseş asqormasın tağın da zur alğarışlarnıñ başlanğıçına äwerelderü öçen Türkiyä ğasırın başlıybız,”-dide ilbaşı häm bolay dip däwam itte: “Yıllar buyı yasalma ğawğalar häm bäreleşlär belän bu däwlätneñ waqıtın häm köçen sarıf itüçelärgä qaramastan, bez icat häm xezmät däräcäsen daimi räweştä arttırabız. Säyäsi diplomatiyä häm iminlek uñışları belän bergä investiśiyälär, mäşğul’lek, êksport belän üstergän ilebezne Türkiyä ğasırı belän iñ öskä kütärergä äzerbez”.