Terrorçı Axlam Älbäşirne törmägä ozattılar

İstanbulnıñ İstiklyal uramındağı bombalı höcüm belän bäyle tikşerüdä bombanı quyğan terrorçı Axlam Älbäşirne dä kertep 17 şöbhälene qulğa alu qararı çığarıldı.

Älege êş buyınça 49 şöbhäle saq astına alınğan ide. Alardan ike general’ prokuror urınbasarı häm 29 prokuror soraw aldı. Prośessnıñ säğat’lär buyı däwam itüe bilgele. Prokuratura 49 şöbhäleneñ 17sen mäxkämägä tapşırdı. 29ın isä deportaśiyäläw qararı çığarıldı. 3 şöbhälegä qarata mäxkämä kontrole şartı quyıldı.

Mäxkämägä tapşırılğan şöbhälelärneñ mäğ’lümatların isä ike sud’ya aldı. Soñınnan Axlam Älbäşirne dä kertep 17 ğayeplänüçene törmägä ozattılar.

İstiklyal uramındağı terrorçı höcümeneñ töp ğayeplänüçese Axlam Älbäşirneñ poliśiya häm prokuraturadağı soraw aluda törle mäğ’lümat birüe bilgele buldı. İminlek saqçılarına berençe añlatuında ul êskämiyädä utıruın, beräwneñ üzenä fotosın cibärüen häm şunnan panikağa birelep êskämiyädän toruın häm kibetkä kitüen söyli.

Tikşerü barışında monıñ yalğan buluı anlaşıla. Prokuraturadağı añlatuı da aldağı süzläre belän turı kilmi.

Bombaçı Axlam Älbäşir prokuraturada, üzen aqlaw öçen, sumkada närsä buluın belmäwen äyta. Tik bu kürsätmäse anıñ şartlawdan 11 kön êlek küzätü öçen Taksimğa baruı belän qapma-qarşı.  

Älbäşirneñ tağın ber yalğanı isä irle-xatınlı şikelle qılanğan terrorçı Bilal Xassan belän bäyle. Başta ul ir-atnıñ bergä tuqtalğan öydän hiç tışqa çıqmawın söyläde, annarı Taksimğa bergä baruların äytte. Bilal Xassannıñ telefonı şaltırağaç, kötärgä quşıp, Älbäşir yanınnan kitkän.

Terrorçı xatın prokuraturadağı soraw aluda üzen Türkiyägä PKK/YPG cibärüen dä citkerä. Bilal Xassan belän irle-xatınlı şikelle qılanıp alar 27nçe iyül’dä qanunsız yullar belän Türkiyäneñ Xatay töbägenä kerä. Annan ber texnikağa utırıp İstanbulğa kilälär häm terrorçı oyışma belän bäyläneşle Färxat Xabäşneñ öyendä urnaşalar.

Bombalı höcümgä yärdäm itkän terrorçı oyışma äğ’zası “Xüsam” kod iseme astında êş itüçe terrorçınıñ poliśiyä idaräsendäge soraw aluı däwam itä.