İstanbul aêroportın 4 yılda küpme yulçı qullanğan?
Türkiyä transport häm asqorma ministrı Adil Qaraismailoğlu İstanbul aêroportın 4 yılda 160 millionnan kübräk yulçınıñ qullanuın belderde
Qaraismailoğlu 2018nçe yılnıñ 29nçı üktäbr’ könne açılğan İstanbul hawa mäydanı belän bäyle bularaq yasağan yazmaça belderüendä İstanbul aêroportınıñ yaña tör koronavirus (Kovid-19) kizüenä qaramastan qısqa waqıt êçendä Türkiyäneñ aviaśiya ölkäsendä dönyanıñ iñ möhim transfer üzäklärennän bersenä äylänüen belderep: "4 yılda tuplam 1 million 109 meñ 386 oçqıç töşte häm oçtı, 160 million 268 meñnän kübräk yulçı İstanbul aêroportın qullandı”, - dip bäyäläw yasadı.
İstanbul hawa mäydanınıñ qısqa waqıtta yulçı häm oçış sannarında köndäşlären artta qaldıruına basım yasawçı Qaraismailoğlu:
"İstanbul hawa mäydanı kizü barışınnan soñğı cayğa salınuı belän bergä ireşkän köçle tendenśiyasın däwam itterä. İstanbul aêroportı dönyanıñ iñ möhim transfer üzäkläre arasında üz urının aldı häm Awrupanıñ iñ tığız hawa mäydanı buldı.
Awrupa xalıqara hawa mäydannarı şurası mäğ’lümatlärenä kürä, bıyıl 3nçe çirektä iñ küp yulçı qabul itkän aêroportlar isemlegendä İstanbul hawa mäydanı 19 million 957 meñ 147 yulçısı belän Awrupa aêroportları arasında berençe buldı, London, Parij häm Amsterdam hawa mäydannarın artta qaldırdı.
Bıyıl ğıynwar’-sentyabr’ çorında isä 313 meñ 778 oçışnı qabul itte. 47 million 571 meñ 888 yulçığa da işeklären açtı. 4 yılda tuplam 1 million 109 meñ 386 oçqıç töşep xäräkät itte, 160 million 268 meñnän kübräk yulçı İstanbul aêroportın qullandı”, - dip mäğ’lümat birde ministr.
Qaraismailoğlu Awrupanıñ iñ awır aviaśiya imtixannarınnan bersen birgän 2022nçe yılnıñ iyül’ ayında İstanbul aêroportınıñ könenä 1 meñ 422 oçış belän tarixi rekord quyuın belderde.
Ministr Qaraismailoğlu: "Bu qısada 2019nçı yılda 329 meñ 900 oçışnı häm 52 million 9 meñ 220 yulçını qabul itkän İstanbul hawa mäydanı terkälgän şuşı sannarğa 2023nçe yılğa qalmıyça ireşüne maqsat itä”, - dip äytte.
Qaraismailoğlu: "Säyäxät jurnalı “Conde Nast Traveler” uquçıları İstanbul hawa mäydanın “dönyanıñ iñ yaxşı aêroportı” itep sayladı. Açılğan könnän birle İstanbul aêroportı 60tan kübräk büläk aldı," – dip iskärtep uzdı.
