Türkiyä ilbaşı Azärbaycanğa ber könlek êşlekle säfär qıldı

Türkiyä ilbaşı Räcäp Tayyip Ärdoğan Azärbaycanğa ber könlek êşlekle säfär qıldı.

Ul säfär qısalarında Zängilanğa kilde.

Ärdoğan Zängilan aêroportına kilgän berençe çit il däwlät başlığı buldı.

Hawa mäydanı tözeleşendä Türkiyä şirkätläre dä qatnaştılar.

Bu - êlek Ärmänstan yawı astında bulğan Azärbaycan cirlärendä tözelgän ikençe aêroport.

Azärbaycan 2020 nçe yılnıñ noyabrendä, Türkiyäneñ dä yärdäme belän, Ärmänstanğa qarşı ciñü yawladı.

Azärbaycan ilbaşı İlham Aliyev: ”Türkiyä - Azärbaycan berlege, berdämlege - töbäktä citdi faktor.Tınıçlıq häm totrıqlılıq faktorı.

Ägär kem dä bulsa da bezgä qarata ğadelsezlek êşlärgä teläsä, bu faktnı citdi räweştä küz uñında totsın. İkençe Qarabax suğışınnan soñ bez bu berdämlekne tağın da nığıttıq.Türkiyä häm Azärbaycan bayraqları böten cirdä bergä cilferdi. Bolar yöräktän çıqqa xislär häm ata-babalarıbızdan qalğan miras.

İlbaşı Ärdoğan häm anıñ delegaśiyäseneñ monda buluı, bezneñ härwaqıttağıça bergä buluıbıznı kürsätä.Töbäktän kitkän ärmän ğaskärläre biredä cimereklek qaldırdılar”,- dide.

Türkiyä ilbaşı Räcäp Tayyip Ärdoğan:

“Xörmätle Aliyevtan AİXO (OSCE) häm Awrupa Berlege bu cirlärne kürdeme dip soradım. Ul alarnıñ kilmäwlären äytte. Alar nigä kilmilär?

Çönki alar biredä üzläreneñ oyat häm xurlıqların küräçäklär.Alar mondağı cimereklekne kürergä telämilär, läkin monda nilär bulğanın belälär.

Azärbaycan qabat kütärelä, üsä. Bireda Qarabaxnıñ üseş dastanı yazıla.

Mondıy möhim proyektta Türkiyä şirkätläreneñ dä qatnaşuı bezneñ öçen tağın ber ğorurlıq çığanağı.

Bez azärbaycanlı qardäşlärebezneñ azat itelgän cirlärgä kire qayta başlawlarına da bik şat. Naxçıvannı Azärbaycannıñ könbatış öleşlärenä totaştıraçaq Zengezur koridorına qağılışlı qayber dairälärdäge qurqu häm borçılular minemçä nigezsez. Azärbaycan ışanıçlı adımnar belän alğa bara. Bu yaña yul töbäk üseşenä öleş kertäçäk hämkönçığış-könbatış urta koridor marşrutındağı barlıq illär öçen säwdä häm investiśiya mömkinlekläre tudıraçaq”,- dide.

Ärdoğan säfär qısasında Aqıllı awıl xucalığı proyektınıñ açılışın yasadı, timer yul stanśiyäsenä nigez saldı häm töbäklär arasındağı bäyläneşne yaxşırtu öçen yaña yul liniyäläre xaqında söyläşülär ütkärde.

İke il şulay uq regional’ qurqınıçsızlıq häm Ärmänstan belän mönäsäbätlärne cayğa salu mömkinlekläre turında da söyläştelär.

Ärdoğan häm Aliyev ike il arasındağı xezmättäşlekne arttırırğa kileştelär.

İke citäkçe êlek yaw astında bulğan Azärbaycan cirlärendäbaşqarılaçaq üseş proyektlarınıñ Azärbaycanğa ğına tügel, ä töbäktä tağın da tirän bötenläşügä, berläşügä fayda kiteräçägen belderdelär.