Rusiyä Awrupa Berlege belän Türkiyä çigendä zängär yağulıq säwdä mäydanı oyıştırırğa teli

Türkiyä ênergetika häm tabiğıy çığanaqlar ministrı Fatix Dönmäz Rusiyä ênergetika şirkäte Gazpromnıñ citäkçese Aleksey Miller belän oçraştı. Alar Mäskäwdä uzuçı “Rusiyä ênergetika atnası” çarası qıslarında küreşte.

Gazpromnan belderülärençä, söyläşüdä Rusiyä tabiğıy gazın Türkiyägä Zäñgär ağım häm Türkağım ütkärgeçläre aşa ışanıçlı räweştä qudıru turında da süz bardı. Monnan tış, Aleksey Miller zäñgär yağulıq täêminatı öçen Türkiyäneñ Awrupa Berlege çigendä gaz taratu üzäge buldıru turında da söyläde. Ul “Rusiyä ênergetika atnası” çarasında da çığış yasap älege temağa tuqtaldı.

“Gazprom yaña gaz transferı ob’yektların tözergä texnik yaqtan äzer. Taratu üzäge buldıruğa kilgändä, Awrupa Berlege belän Türkiyä çigendä zängär yağulıq säwdä mäydanı oyıştıru mäs’äläsen, hiçşiksez, qarap çığarğa kiräk,”-dide Miller.

Anıñ älege belderüe Rusiyä däwlät başlığı Vladimir Putinnıñ sabotajlar arqasında êşli almaslıq xälgä kilgän Tön’yaq Ağım ütkärgeçläre aşa transfer itelä almawçı gaznıñ Türkiyädän Awrupağa cibärelä aluın äytüennän soñ yasaldı.