BMOdan Türkiyägä räxmät

BMO ğomum särqatibe Antonio Guterriş Rusiyä belän Ukraina arasında 200dän artıq suğış äsire almaşudağı role öçen Törkiyägä räxmät äytte. Ul BMO İminlek şurasında tışqı êşlär ministrları qatnaşında oyıştırılğan utırışta çığış yasadı. Guterriş 24nçe fevral’dä başlanğan Ukraina-Rusiyä suğışınıñ betär şikelle kürenmäwenä iğ’tibar cälep itte. Ul Rusiyä däwlät başlığı Vladimir Putinnıñ mobilizaśiya qararınıñ “xätär häm xäwefle” buluın assızıqlap, bu adım belän solıxtan yıraqlaşuın häm tağın da kübräk qan tügeläçägen äytte.  

“Bu mäğ’näsez suğış Ukrainağa häm böten dön’yağa çiksez häm qurqınıç zarar birü potenśialına iyä,”-dide BMO ğomum särqatibe.

Guterriş Ukrainanıñ könçığışındağı referendum plannarınıñ da bik borçu tudıruçı buluın äytte. Ul köç qullanıp başqa däwlätneñ cirlären basıp alunıñ xalıqara xoquq häm BMO kileşüen bozuına basım yasadı.

Guterriş Ukraina häm Rusiyä arasında 200dän artıq xärbi äsir almaşunıñ uñay küreneş buluın citkerep bolay dide: “Bu kileşügä kertkän öleşläre öçen Türkiyä häm Soğud Ğaräbstanı xökümätlärenä räxmätemne belderäm”.

Antonio Guterriş Türkiyäneñ yärdäme belän iyül’dä Ukraina häm Rusiyä arasında imzalanğan aşlıq kileşüe näticäsendä 4,3 million metrik tonnadan artıq azıq-tölek êksportınıñ tormışqa aşırıluın da xäterlätte. Aşlıq taşuçı korablar Äfğanstan, Yämänne dä kertep, moxtaclıq kiçerüçe 29 ilgä kitkän.