Türkiyä BMOnıñ uyğır xisabın bäyäläde
Türkiyä Berläşkän Millätlär Oyışması keşe xoquqları yuğarı komissarlığınıñ Qıtaynıñ Şeñcan uyğır üzidaräle töbägendäge keşe xoquqları torışına qağılışlı xisabınıñ Türkiyäneñ bu mäs’älädä telgä alğan borçıluların raslawçı üzençälektä buluın belderde
Türkiyä Tışqı êşlär ministrlığı süzçese, tulı wäqalätle ilçe Tanju Bilgiç BMO keşe xoquqları yuğarı komissarlığınıñ töbäktäge wazğıyät belän bäyle xisabına qağılışlı sorawğa yazmaça cawap birde.
Xisaptağı bilgeläwlärneñ häm bäyäläwlärneñ iğ’tibarğa alınuınıñ bik zur ähämiyätkä iyä buluın belderüçe Bilgiç: "BMO keşe xoquqları yuğarı komissarlığınıñ Şeñcan uyğır üzidaräle töbägendäge torış belän bäyle bularaq bastırğan soñğı xisabı töbäktä yäşäwçe uyğır törkiläre häm başqa möselman azçılıqlarğa qağılışlı ilebez häm xalıqara cämäğätçelektä telgä alınğan borçılularnı raslawçı üzençälektä”, - dip bäyäläw yasadı.
Bilgiç, Türkiyäneñ mäs’älä belän bäyle sizgerlegen Qıtay xakimiyätenä citkerüen iskärtep uzıp:
"Uyğır törkiläreneñ mullıq häm xozur êçendä yäşäwlärenä, töp xaq-xoquq häm xörriyätläreneñ saqlanuına qağılışlı kötkännärebezgä häm sizgerlegebezgä Qıtay Xalıq Cömhüriyäte citäkçelege belän ike yaqlı êlemtälärebez waqıtında bulmasın, Berläşkän Millätlär Oyışması belän bergä xalıqara platformalarda bulmasın, basım yasala”, - dip belderde.
Qıtaynıñ çaqıruı qısalarında Türkiyädän wäkillekneñ häm Türkiyäneñ Pekin ilçeseneñ töbäkkä baruınıñ berniqadär waqıt kön tärtibendä buluın da xäterlätüçe Bilgiç:
"Säfärlärneñ mäğ’näle, kiñ qırlı häm kirtäsez yasaluına qağılışlı teläklärebez ütälgän oçraqta şuşı säfärlär başqarıla alınaçaq”, - dide.
Yuğarı komissarlıq xisabında nigezsez totqarlawlar, terrorçılıq häm êkstremizm belän köräş iseme astında citdi däräcädä keşe xoquqların bozu oçraqları, yañadan öyrätü lagerlarında totılğannarğa qurqınıç cäberläwlär, naçar möğamälä häm mäcbüri däwalaw kebek ğamällär turında ışanıçlı farazlarnıñ buluı citkerelgän ide.
