Ukrainadan aşlıq çığaru öçen koordinaśiyä üzäge açıldı

Aşlıqnı Ukrainadan ışanıçlı räweştä çığaru öçen İstanbulda oyıştırılğan Konsul’tativ koordinaśiyä üzäge räsmi bularaq açıldı. Tantanada Törkiyä milli saqlanu ministrı Xulusi Akar çığış yasadı. “Êşçänlekneñ böten dön’yağa täêsir itkän azıq-tölek krizisın ciñügä, bigräk tä bäyälärneñ töşüenä ähämiyätle öleş kertäçägenä ışanabız,”-dide ul.  

Akar 25 million tonnadan artıq aşlıqnı çığaru öçen koridornıñ zarur buluın äytte. Ministr İstanbudağı üzäkneñ burıçınıñ Ukrainadan êksportlanaçaq aşlıq häm aña oxşaş tovarlarnı Odessa, Çernomorsk häm Yujnıy portlarınnan diñgez aşa isän-imin taşunı täêmin itü buluın söyläde.

Konsul’tativ üzäk Törkiyä, Rusiyä, Ukraina häm BMOnıñ 5är wäkilennän tora. Aralarında xärbi dä, grajdanlı da bar. Ministr Akar êşçänlek mäydanında isä bernindi xärbi êlement bulmayacağın belderde.

“Bu üzäk iniśiativada qatnaşaçaq säwdä qorabların terkäp toraçaq, êlemtä yulları aşa alarnıñ xäräkäten texnik yaqtan küzätäçäk, barlıq ğamällärne qızıqsınuçı däwlätlär hän BMO belän kileşenep alıp baraçaq,”-dip söyläde Akar.

Ukraina portlarınnan töyäw häm Törkiyädäge noqtalarğa buşatu maxsus törkemnärneñ kontrole astında başqarıla.

Diñgezdä minalardan çistartu kiräk bulsa, yaqlar kileşep plan töziyäçäk. Akar beldergänçä, älegä moña ixtiyac yuq.