"Ukraina portlarındağı aşlıqnı qurqınıçsız êksportlaw turındağı söyläşülär İstanbulda ütkärelä"
Bu xaqta Törkiyä milli saqlanu ministrı Hulusi Akar belderde
Törkiyä milli saqlanu ministrı Hulusi Akar xärbi wäkilleklär arasında Ukraina portlarındağı aşlıqnı qurqınıçsız êksportlaw turındağı söyläşülärneñ irtägä İstanbulda ütkäreläçägen belderde.
Ministr ilbaşı Räcäp Tayyip Ärdoğannıñ “azıq-tölek krizisın” çişü yünäleşendäge diplomatik tırışlıqlarınıñ uñay näticä birüen äytte.
Hulusi Akar üzeneñ dä Rusiya häm Ukraina saqlanu ministrları belän bu temağa küp söyläşülär ütkärüen xäterlätte.
Ul Törkiyä saqlanu ministrlığı wäkillegeneñ “azıq-tölek krizisın” çişü öçen Rusiya xärbi delegaśiyäse belän Mäskäwdä oçraşuın, annarı Ukraina xärbi wäkillegeneñ Törkiyägä kilüen äytep uzdı.
”Bu oçraşulardan soñ irtägä Törkiyä, Rusiya, Ukraina saqlanu ministrlıqları xärbi delegaśiyäläre häm Berläşkän Millätlär Oyışması wäkillege İstanbulda Ukraina portlarındağı aşlıqnı qurqınıçsız räweştä xalıqara bazarlarğa cibärü turında söyläşülär ütkäräçäk”,- dide Hulusi Akar.
