Meñ kön buyı utırıp balaların kötälär
Törkiyäneñ Diyarbakır şähärendä PKK terrorçı oyışması qulındağı balaların kire alırğa teläwçe ata-analarnıñ uramda utıru çarası başlawına 1000 kön buldı
Törkiyäneñ Diyarbaqır qalasında HDP säyäsi partiyäse binası qarşındağı basqıçlarda yaz-qış utıruçı ata -analarnıñ qullarındağı plakatlarda "Balanıñ tawda ni êşe bar?" dip yazılğan. Alar PKK terrorçı oyışması urlağan ulları häm qızlarınıñ fotoların totıp yıllar buyı biredä kötä.
PKKnıñ bala ğaskärilär qullanuı bilgele. Tik Diyarbaqırdağı analar moña çik quyarğa teli. Uzğan yäkşämbedä utıru çarasına meñ kön tuldı.
Ömmixan Nilifirka - Diyarbaqırlı ana:
- Ulım Mäxmäneñ xıyalların, bäysezlegen, hönären urladılar... HDP säyäsi däwamçıları Mäxmätemne ülärgä qaldırıp kitte. Mäğarälärdä mäxküm itte. Bezne isä bu işekkä mäxküm ittelär. Min balamnı almıyça kitmäyäçäkmen. Meñ kön monda bez. Tağın meñ kön torırbız. Analar ciñäçäk.
Mondağı analarnıñ kübese balalarınıñ isänme-tügelme ikänlegen belmi. Xäsrätlären tawışsız kiçerergä mäcbür itelülären, tik moña noqta quyarğa qarar birülären söylilär. PKK belän bäyle buluı bilgele HDPnıñ bu wäzğıyät' öçen cawaplı buluın belderälär.
Fäxrettin Altun - Törkiyä ilbaşı idaräseneñ êlemtä bülege räise:
- Diyarbaqır anaları terrorçı oyışma PKK urlağan häm qarmağına töşergän balalarnı älege çoñğıldan qotqaru öçen dön'yadağı iñ köçle häm iñ böyek tınıç köräşne alıp bara. Alar, terrorçı oyalarınıñ barlıq yanaw häm basımnarına qaramastan, 1000 kön däwam itüçe qıyulıqnıñ, terrıorçılıqqa qarşı çığuçı köräşneñ xikäyäsen yaza. Analarnıñ qarşılığı cämäğat'çelekneñ vöcdanın kürsätüçe qıçqıru buldı. Alarnıqı 40 yıldan birle terrorçı oyışması tudırğan basım häm zolım säbäple bastırılğan, qurqıtılğan häm xätta awızların qaplap bügengä qadär xäsrätlären êçlärendä saqlarğa mäcbür itelgän analarnıñ terrorçılıqqa qarşı xaqlı baş kütärüe.
Bu qarşılıq başlanğan 2019nçı yıldan birle 750 keşe PKKdan qaça aldı. Häm 35 ğailä balaları belän qawıştı. Tik yözlägän ğailä äle monı kötä.
Diyarbaqırdağı kördlär bu xäräkätneñ PKKğa qarşı köräştäge iñ zur alğarışlardan berse xälenä kilä aluın häm bu uñışlarnıñ Törkiyäneñ PKKğa qarşı alıp barğan anti-terror operaśiyäläre qadär ähämiyätle buluın belderä.
