İzmir büläkkä layıq buldı

Awrupa şurası parlament assambleyası “Awrupa büläge”nä bıyıl Törkiyäneñ İzmir şähären layıq dip taptı. Bu xaqta oyışmanıñ räise Tayni Koks Franśiyäneñ Strassburg şähärendä baruçı utırışta xäbär itte.

Awrupa şurasınnan yasalğan belderüdä dä Törkiyäneñ iñ zur öçençe qalası İzmirneñ 24 şähär belän tuğandaş buluı, çit il mêriyäläre belän iq’tisadi, sośial’ häm mädäni xezmättäşlekkä ähämiyät birüe äytelä. Anda, şulay uq, bik küp çit il delegaśiyäläreneñ şähärgä säfär yasawı häm biredä xalıqara çaralar oyıştırıluı assızıqlana.  

Belderüdä İzmirneñ tabiğıy afätlär qorbanı häm moxtac keşelärgä teläktäşlek kürsätüçe qala buluı da citkerelä.  Ul “Awrupa şähärlär berlege” bularaq isemlängän EUROCITIES häm Urta diñgez qalaları berlege şikelle xalıqara oyışmalarda da aktiv rol’ başqara.

2022nçe yılğı Awrupa büläge öçen Germaniyäneñ Bamberg häm İngol’ştadt, Pol’şanıñ Boleslaveś, Litvanıñ Palanga häm Ukrainanıñ Ternopol’ şähärläre dä namzät ide.

Älege büläk 1955nçe yıldan birelä başladı. Törkiyädän monnan alda İstanbul, Bursa häm Änkara aña layıq bulğan ide.