Törkiyä fälästinle ananıñ üterelüen ğayepläde

Törkiyä Yordannıñ basıp alınğan könbatış üzänlegendä fälästinle 47 yäş’lek xatın-qıznıñ İzrail köçläre tarafınnan atıp üterelüen kisken ğayepläde.

Tışqı êşlär ministrlığınnan yasalğan belderüdä kiçä Bäytullaxim şähäre yanında üterelgän Gadä Säbatinnıñ ğailäse häm yaqınnarınıñ qayğısı urtaqlaşıla.

“Bernindi qurqınıç tudırmawçı fälästinle xatın-qıznı İzrail qorallı köçläreneñ hiç kisätep tormıyça atıp üterüen kisken ğayeplibez. İzrail xökümäten, älege waqıyğanı riyasız häm külämle räweştä tikşerep, cawaplılarnı tiz arada xökem itärgä häm mondıy keşeleksez xällärneñ qabatlanmawı öçen kiräkle çaralarnı kürergä çaqırabız” diyelä belderüdä.

Kiçä Bäytullaxim qalasınıñ könbatışındağı Xusän cirlegendä İzrail ğaskärläre açqan ut näticäsendä awır yaralanğan 6 bala anası Gadä Säbatin küp qan yuğaltıp xastaxanädä ülä.  İzrailneñ “Haaretz” gazetı yazğança, xatın-qız xärbilär öçen bernindi yanaw tudırmıy, anıñ qulında pıçaq yäisä qoral bulmıy.