Törkiyä ministrınıñ Rusiyä-Ukraina söyläşüläre turındağı belderüe

Çavuşoğlu: "Här êtapta taraflar arasında yaqınayunıñ artuın bügen qanäğätlelek belän küräbez. Bez bu barışqa öleş kertergä, yaqlaw kürsätergä bik şat. Härwaqıt basım yasağanıbız kebek iñ östenlekle mäs’älä iñ tiz arada utnı tuqtatunıñ täêmin itelüe, daimi säyäsi çişeleş yulınıñ açıluı”, - dip äytte.

Meñnärçä keşeneñ ülemenä häm millionlagan keşeneñ migraśiyasına säbäp bulğan suğışnı tuqtatırğa çaqıruçı Çavuşoğlu:

"Qayber mäs’älälärdä kileşü häm urtaq añlayışqa ireşelde. Söyläşülär başlanğannan birle iñ mäğnäle alğa kiteş bügen buldı. Tağın da awırraq mäs’älälärneñ yuğarı däräcälärdä quzğatılaçağın küräbez. Monnan soñğı barışta här ike ilneñ tışqı êşlär ministrlarınıñ oçraşıp, urtaq añlayışqa soñğı şäkelne birüläre küzdä totıla. Annan soñ kön tärtibendä här ike il däwlät başlıqlarınıñ oçraşuı”, - dip bilgeläp uzdı.

Çavuşoğlu, söyläşülärdä humanitar yärdäm häm humanitar koridorlarnıñ açıluı mäs’älälären dä quzğatuların belderep: "Bügengä çaqlı 16 meñ 500dän kübräk watandaşıbıznı Ukrainadan êvakuaśiyälädek”, - dip äytte.

Häm törek watandaşlarınıñ häm dä öçençe il watandaşlarınıñ êvakuaśiyası öçen taraflar häm xalıqara oyışmalar belän koordinaśiya êçendä êşçänlekneñ alıp barıluın citkerüçe Çavuşoğlu bolay dide:

"Bez şulay uq töbäktä qamalıp qalğan köymälärebezneñ çığuı häm navigaśiya qurqınıçsızlığı mäs’äläsen dä quzğattıq. Bügenge söyläşülär monnan aldağı söyläşülärdä bulğanı kebek taraflarnıñ Törkiyägä qarata ışanıçlarınıñ kürsätkeçe. Bezgä toyılğan ışanıçnı häm cawaplılıqnı yaxşı añlıybız. Qoyılğan qannıñ tuqtatıluı, utnı tuqtatunıñ täêmin itelüe häm daimi tınıçlıqqa ireşelüe öçen xalıqara cämäğätçelek belän koordinaśiya êçendä tırışlıqlarıbıznı däwam itteräçäkbez."