Antaliyadağı öç yaqlı söyläşü çit il matbuğatında

Germaniya matbuğatı krizisnıň diplomatik yullar belän çişeleş tırışularında böten iğ’tibar Antaliyadağı şuşı kritik söyläşügä yünälgän buluın yaza.

“Tagesschau” internet portalında Ukrainağa qarşı suğışnı tuqtatu öçen diplomatik kanallardan çişeleş tabu tırışlığına iğ’tibar yünältelep, 10nçı marttağı oçraşunıň suğış başlanğannan birle Rusiyä häm Ukraina arasındağı berençe xökümätlärara kiňäşmä bulaçağı bilgeläp uzıla.

Germaniyanıň “Der Spiegel” gazetı isä xäbärne "Oçraşu pänceşämbe könne” iseme belän citkerä.

Oçraşunıň Rusiyä höcümnäreneň başlanuınnan birle ike il arasındağı yuğarı däräcäle berençe cıyılış bulaçağına basım yasalğan yazmada: "Xäzergä qadär här ike ildän tağın da keçeräk delegaśiyälär nindi dä bulsa çın kileşügä ireşmiçä oçraştı. Xäzer isä Törkiyäneň aradaşçılığında oçraşa”, - dip äytelä.

Amerikan “Politico” gazetı isä cıyılışnıň ütkärelüe waqıtına iğ’tibarnı yünältep, 1 million yarımnan kübräk keşe ilne taşlap kitärgä mäcbür bulğan Ukrainağa qarşı höcümneň başlanuınnan näq’ ike atnadan soň oçraşunıň uzaçağına işaräli.

Franśiya matbuğatı Rusiyäneň Ukrainağa höcümnärne başlatuınnan birle Tışqı êşlär ministrı Lavrovnıň berençe çit il säfären Antaliyağa yasayaçağın belderä.

Höcümnärneň başınnan birle Änkaranıň tigezlek qorırğa tırışuı belderelgän xäbärlärdä: "İlbaşı Räcäp Tayyip Ärdoğan ike il arasında aradaşçılıqnıň täşviq itelüendä tığız räweştä qatnaştı”, - dip äytelä.

Bel’giyanıň “RTBF” däwlät kanalı da İlbaşı Ärdoğannıň Ukrainada humanitar koridorlarnıň "aşığıç" räweştä açıluı çaqıruın citkerä.

Rusiyäneň “Kommersant” basması xäbärne "Lavrov häm Kuleba Antaliyada krizisnı söyläşäçäk” dip atağan bulsa, “İzvestiya” gazetı "Lavrov häm Kuleba Antaliyada oçraşu öçen kileşte” dip yaza.

Rusiyä xärbiläre 24nçe fevral’dä Ukrainağa höcüm başlatqan ide.