Ärdoğan Ukrainağa kitte

Törkiyä ilbaşı Räcäp Tayyip Ärdoğan Ukraina däwlät başlığı Vladimir Zelenskiynıñ çaqıruı buyınça bügen Kiyevqa säfär yasıy. Ul yulğa çığar aldınnan Änkaranıñ Äsänboğa aêroportında matbuğat ähelläre belän oçraştı.

Ärdoğan Rusiyä belän Ukraina arasındağı kiyerenkelekne küzätep baruların häm Ukrainanıñ bäysezlegen, suverenlığın yaqlawların här platformada telgä aluların äytte. “Qara diñgez yarı däwläte bularaq bez regionda tınıçlıq xakimlek itsen öçen barlıq yaqlarnı tıyılıp torırğa häm dialogqa çaqırabız,”-dide ul.

Ärdoğan Ukraina başqalası Kiyevta däwlät başlığı Vladimir Zelenskiy belän Yuğarı däräcäle strategik şura utırışında oçraşaçaq. Anda ike däwlät arasında säwdä äyläneşen arttıru turında söyläşü häm İrekle säwdä kileşüen imzalaw küzallana.

Oçraşularnıñ töp teması Rusiyä belän Ukraina arasında artqan kiyerenkelek bulaçaq. Ärdoğan belän Zelenskiy Mäskäw-Kiyev sızığındağı basımnı töşerü öçen nilär êşlänä alınuın qarayaçaq.

Ärdoğan krizisnın ikençe yağındağı Rusiyä däwlät başlığı Putinnı da tizdän Törkiyädä qabul itärgä cıyına.