Altun: "Törkiyä immigraśiya säyäsäte belän dönyağa ürnäk buldı"

Altun başqala Änkarada İlbaşı idaräse êlemtä räislegeneñ yärdäme belän Xalıqara media informaśiya cämğıyäte tarafınnan oyıştırılğan Möhacirlär häm media cıyılışınıñ açılışında çığış yasadı.

İlbaşı idaräseneñ êlemtä başlığı Altun globalläşü söyläme häm liberalizaśiya tendenśiyäläre kütärelgän çornı qaldırıp, Könbatışnıñ, ber yaqtan, sośial’ däwlät krizisına şahit buluın, ikençe yaqtan, säyäsi bularaq tarqalu tendenśiyasın küzätülären äytte.

Altun: "Bez kilep citkän torışta Könbatış dönyası, qızğanıç, rasaçılıq häm ksenofobiya artqan, sośial’ gettoizaśiya kübäygän mädäni geografiya bularaq aldıbızğa kilep basa”, - dip bäyäläde.

Problemalar milli tügel, ä xalıqara bulıp kitkän yaña çor kiçerelüen iskärtep uzuçı Altun: "Bu çorda Törkiyä totrıqlılandıruçı köç bularaq häm üz iminlege belän totrıqlılığı, häm dä töbäk illäreneñ iminlege belän totrıqlılığı öçen mäydanda häm östäldä köräş alıp bardı. Bik anıq häm möhim qazanışlarğa ireşte. Bu ölkädä Törkiyä çınlıqçı häm humanitar immigraśiya säyäsäte belän dönyağa ürnäk buldı”, - dip belderde.

İlbaşı idaräse êlemtä başlığı Altun Törkiyäneñ, ber yaqtan, suğıştan, terrordan, küpläp ütereleşlärdän qaçıp kitüçelärne qabul itüen, ikençe yaqtan da, öylären taşlap kitkän keşelärgä däräcäle, ışanıçlı häm üzixtıyarıy kire qaytu mömkinlegen tudıru öçen bik tırışıp êşläwen, êşlärgä däwam itüen citkerde.

Altun bügen Germaniyanıñ 530 meñ, Şveśiyanıñ isä 130 meñ Süriyä möhaciren qabul itüenä, bolardan tış hiçber Könbatış ilendä 50 meñnän kübräk süriyäle migrantnıñ bulmawına iğ’tibarnı yünältep, Törkiyäneñ isä Germaniyadan 8 tapqırğa kübräk migrant qabul itüen citkerde.