Sudanda urlanğan töreklär qotqarıldı

Sudan iminlek köçläre ilneñ könbatışındağı Tön’yaq Darfur töbägendä üzläre êşli toran êlektr stanśiyäsennän qaytıp barğanda urlanğan ike törek watandaşın qotqarıp başqala Xartumdağı Törkiyä ilçelegenä tapşırdı.  

Xartum xalıqara aêroportında qotqarılğan Firat Can Baran häm Ömär Günädioğlu öçen oyıştırılğan matbuğat cıyılışında ilçe İrfan Näziroğlu, Sudan operativ yärdäm köçläreneñ küzläw bülege räise Äl-Xayır Abdullax häm başqa wäqalälelär qatnaştı.  Törek injenerları anda belderü yasap, üzlären qotqaruğa öleş kertkän härkemgä räxmät belderde.

Törkiyäneñ Xartumdağı ilçese Näziroğlu qotqarılğan watandaşlarnıñ Faşirdä törek şirkätenä qarawçı êlektr stanśiyäsendä êşläwlären äytte. Älege stanśiyä şul tirädäge toraq punktlarnı ut belän täêmin itä. İlçe waqıyğanıñ töreklärgä qarşı êşlängän ğamäl bulmawın assızıqladı. “Cirlektä iminlek problemaları bar, şunıñ arqasında kilep çıqqan xäl,”-dide ul.

Stanśiyädä êşläwçe 2 törek watandaşı häm sudanlı şofyer 7nçe dekabr’ kiçendä öylärenä qaytışlıy kemlekläre bilgesez keşelär tarafınnan urlanğan ide. Alarnı başqa maşinağa utırtıp alıp kitälär.

Törkiyäneñ tışqı êşlär ministrlığı häm Xartum ilçelege urlanğan törek watandaşların qotqaru öçen Sudan dairäläre belän tığız dialog alıp bardı.