“Ukraina tiräsendäge kiyerenkelek borçıldıra”

Törkiyä tışqı êşlär ministrı urınbasarı tulı wäqalätle ilçe Önal, Ukraina tiräsendä potenśial kiyerenkelekneñ artuına qağılışlı işarätlärneñ borçılu säbäbe buluın belderep: "Kiyerenkelekneñ diplomatiya aradaşçılığı belän azaytıluına ixtıyac bar”, - dip äytte.

İlçe Sädat Önal Sofia iminlek forumınıñ "Transatlantik mönäsäbätlärneñ kiläçäge: yaña iminlek sınawları arasında xezmättäşlekneñ arttırıluına qağılışlı yaña säxifä açıluı” isemle paneldä qatnaşuçılarğa videoyullama belän möräcäğät itte.

Qara diñgez töbägeneñ tağın ber qat kön tärtibendä buluına iğ’tibarnı yünältüçe Önal: "Bez yar buyı häm töbäk däwlätläre bularaq dönyanıñ tarixi strategik bu töbägendä tınıçlıq, iminlek häm totrıqlılıq urnaşuında iñ möhim rolgä iyä. 30 yıl êlek Qara diñgez iq’tisadi xezmättäşlek oyışmasınıñ tözelüe belän bez bilgelägän kebek qurqınıçsızlıq töşençäse iq’tisadi xezmättäşlek, üzara bäyläneş häm üseş belän küätländerelergä tiyeş”, - dip äytte.

Önal töbäkne saqlaw añ-fikereneñ, xalıqara yaxşı kürşe qağıydälären häm nigezlären ütäwneñ, däwlätlärneñ il bötenlegen häm säyäsi berlegen xörmät itüneñ, böten yar buyı häm töbäk illäreneñ yazmış urtaqlığına köçle räweştä ışanunıñ möhimlegen dä iskärtep uzdı.

Tışqı êşlär ministrı urınbasarı Önal: "Xäzerge wazğiyättä Ukraina tiräsendä potenśial kiyerenkelekneñ artuına qağılışlı işarätlär citdi borçılu säbäbe. Bu mäs’älä Rigadağı NATO tışqı êşlär ministrları cıyılışınıñ da östenlekle temalarınnan bersen täşkil itte. Cıyılışta da basım yasalğanı kebek NATO prinśip mäs’älälärendä nıq häm urtaq torışın kürsätergä häm tulı teläktäşlege belän waz kiçertep totqarlawçanlığın saqlap qalırğa, ber ük waqıtta böten yaqlarnı zarar birüçe häm qotqı saluçı ğamällärdän taypıluğa yünältergä tiyeş. Kiyerenkelekneñ diplomatiya aradaşçılığı belän azaytıluına häm töple aqılnıñ xakim buluına ixtıyac toyıla”, - dip belderde.