Siam igezäklären Törkiyädä ayırdılar

Kamerunda tuğan siam igezäklärenä İstanbulda 27 säğat’ buyı operaśiyä yasadılar. Ul uñışlı çıqtı.

Acıbadem Altunizade xastaxanäsennän yasalğan belderügä qarağanda, botlarınnan yabışıp tuğan igezäklär Êlizabet belän Mêrinı Kamerun ilbaşı idaräseneñ iniśiativası belän Törkiyägä kiterälär. Operaśiyädän alda alar 7 ay buyı küp profil’le däwalaw uza. İgezäklärneñ rentgenologik häm angiografik tikşerenülär näticäsendä 3 ülçämle maketları äzerlänä. Bu operaśiyä waqıtında risknı iñ tübän däräcägä citkerü öçen êşlänä. Häm näticädä siam igezäklären xirurglarnıñ 27 säğat’lek êşçänlegennän soñ uñışlı räweştä ber-berennän ayıralar.

Balalarnıñ änise Karolin Akve bolay dip söyli: “Barlıq awırlıqlarğa qaramastan, bäbäyläremne ber-berenä yabışqan xäldä ber yıl buyı imezdem. İkesen dä isän-imin kileş ber-bersennän ayırıp bulaçağına ömetebez berqayçan da sünmäde. Häm ul xıyalıbız törek tabiblarınıñ ğadättän tış tırışlığı häm uñışı belän çınbarlıq buldı”.