Ärdoğan Törkiyä êşquarları sammitına video yullama cibärde

İlbaşı Ärdoğan İniśiator êşmäkärlär waqıfı belän Törkiyä yäş’läre waqıfınıñ Kon’ya qalasında oyıştırğan Törkiyä êşquarlar sammitına video yullama cibärde.

Yuğarı däräcäle oçraşunıñ êşquarlar, iq’tisad häm Törkiyä öçen uñışlı buluın teläwçe Ärdoğan: "Êşquarlıq büläklärenä layıq bulğan êşmäkärlärebezne täbrik itäm. Bıyıl fikerdän iniśiativağa bağışlanğan sammitqa qaraşları, bäyäläwläre, berekmäläre, êşlänmäläre belän öleş kertkän barlıq qatnaşuçılarğa räxmätläremne citkeräm”, - dip äytte.

İlbaşı Ärdoğan, êşquarlıqnıñ millätneñ asılında yatqan üzençälek buluın iskärtep uzıp: "Bez kiräkle asqormanı, mäğarifne, mömkinlekne täq’dim itkän çaqta millätebezneñ här äğ’zaseneñ êşquarlıq häm innovaśiyälär mäs’äläsendä bik produktiv bula aluın beläbez”, - dip äytte.

Ärdoğan, Yäşel üseş inqıylabı belän berençe söyeneçne birgän yaña vizionnarınıñ şäkellänüendä däwlättän şäxsi tarmaqqa xätle härkemgä bik möhim wazıyfalar turı kilüenä iğ’tibarnı yünältep: “Bu qısada bigräk tä yäş’lärebezgä zur ömetlärebezne bağlıybız. Könbatış illäre xalıqları qartaya başlağan, könçığışta äle haman mäğarif häm asqorma problemaları xäl itelmägän çorda ilebez Törkiyä yäş’lärennän alğan köç belän kiläçägenä ömet belän qarıy. Bez yäşägän här täcribä, bez kiçergän här bäla-qaza millätebezneñ maqsatlarına ireşüdäge täwäkkällegen nığıta. Anadoludağı berençe däwlätebez Sälcuqlı başqalası Kon’yada oyıştırılğan Törkiyä êşquarlıq oçraşuı zur häm köçle Törkiyäneñ tözelüe öçen barıbızğa da ilham biräçäk”, - dip äytte.