"BMO häm başqa oyışmalarnı üzgärtep qorırğa!"

Törkiyä ilbaşı Räcäp Tayyip Ärdoğan barlıq cäberlängännär häm qorbannar isemennän alıp barıluçı köräşne tağın da köçäytü niyätendä buluların belderde. Ul “TRT World Forum 2021”gä videoyullama cibärde. İlbaşı üz çığışında keşelek dön’yasınıñ iq’tisadi, sośial’, säyäsi, külämle sälamätlek krizisı belän köräşüen xäterlätep, bu çorda kiçerelgännärneñ monnan soñ bernärsäneñ dä êlekkege şikelle bulmayaçağın kürsätüen äytte.

Ärdoğan beldergänçä, barlıq keşelekneñ kiläçägenä yanawçı bu krizis qarşında dön’yada tınıçlıq häm ğadellek täêmin itärgä tiyeşle oyışmalar tağın üzeneñ buldıqsızlığın isbatladı.

“Öçençe dön’ya illäre häm yarlı qatlamnar üz yazmışlarına taşlap qaldırıldı, säwdädä protekśionizm artsa da, täêminat çılbırı özelde. İq’tisadi problemalar belän berrättän könbatış däwlätlärendä ksenofobik cinayät’lär qurqınıç däräcägä citte,”-dip söyläde Ärdoğan. Ul awrupalı säyäçätçelärneñ cämğıyät’ne yaman şeş küzänäkläre şikelle biläp alğan islamofobiya belän köräşü urınına, monı qullanu, säyäsi qoralğa äwerelderü häm tawışlar cıyu cayın qarawın assızıqladı.

Ärdoğan dön’yadağı xäzerge sistemanıñ inde küptän ğadellek häm totrıqlılıq kitermäwen äytte.

“İslam dön’yasınıñ êndäşergä xaqı bulmağan, Afrikanıñ, Latin Amerikasınıñ, Kön’yaq Aziyanıñ taläpläre iğ’tibarsız qalğan, barı xakimiyätne üz qulında totuçı 5 däwlätneñ mänfäğat’läre kürelä torğan bu sistemanıñ xäzerge tözeleşe belän däwam itüe mömkin tügel. Berläşkän Millätlär häm başqa xalıqara oyışmalarnı üzgärtep qoru ixtiyacın monnan soñ kürmämeşkä salışıp bulmayaçaq,”-dip söyli Törkiyä liderı. Ul bu xaqta inde yıllar buyı”Dön’ya biştän zurraq” dip telgä aluların xäterlätte.

Ärdoğan keşene üzäktä totuçı, ğadellek häm xoquqlarnı alğı planğa çığaruçı, köçlene xaqlı dip tabuçı tügel, xaqlını köçle itüçe global’ tärtip qorılğanğa qadär köräşne däwam itäçäklären belderde.