Törkiyädä afät mäydannarı iğ'lan itelde

Antaliya, Muğla, Märsin, Adana häm Osmaniyädä urman yanğınnarınnan zarar kürgän mäydannar afät zonası dip iğ’lan itelde. Bu xaqta ilbaşı Räcäp Tayyip Ärdoğan belderde. Ul sośial’ mediada “Urman yanğınnarınnan zarar kürgän cirleklärebezne Ğomumi tormışqa täêsir itüçe afät mäydanı dip iğ’lan ittek. Xalqıbıznıñ yaraların bäyläw, yuğaltuların qaytaru, mömkinleklären êlekkegedän tağın da yaxşıraq xälgä kiterü öçen barlıq adımnarnı yasayaçaqbız” dip yazdı.

Ärdoğan yazmasında grafika belän yanğın cirleklären kürsätüçe Törkiyä kartası belän bergä “Ğomumi tormışqa täêsir itüçe afät mäydannarı”n da urtaqlaştı.

Antaliyädä – Manavgat, Akseki, Alaniya, Gündoğmuş häm Gazipaşa rayonnarı, Muğlada – Marmaris, Bodrum, Milas, Köyceğiz häm Seydikemer rayonnarı, Märsindä – Aydıncık häm Silifkä rayonnarı, Osmaniyädä – üzäk häm Kadirli rayonnarı, Adanada – Aladağ, İmamoğlu, Karaisali häm Kozan rayonnarında yanğınnan zarar kürgän barlıq mäxällälär afät zonasına kerde.