Tanılğan futbolçıdan Törek Qızılayına 100 meñ yevro
Mäsut Özil Ramazan ayı uñayınnan xäyriyä çarasına aqça birde
1620460
Tanılğan futbolçı Mäsut Özil Törkiyäneñ Qızılayına 100 meñ yevro birde. Älege aqça oyışmanıñ Ramazan ayına bağışlanğan xäyriyä çarasında qullanılaçaq.
Qızılaydan belderülärençä, Özilneñ iğanäse 128 meñ moxtacğa ireştereläçäk. Bu qısalarda, Ramazan ayında Törkiyädä – 2800, İndoneziyada – 1000, Bangladeştağı arakanlı möselmannar lagerında 750 azıq-tölek tartmaları taratılaçaq.
Monnan tış, Süriyäneñ İdlib töbägendäge yätimnär yortında häm Somalinıñ Mogadişo şähärendä 30 kön buyı iftar aşları bireläçäk, balalarğa uyınçıqlar taratılaçaq.
