Urlanğan törek diñgezçelären qotqardılar
Alar Nigeriyada piratlar qulında ide
1582689
Nigeriyä yanındağı sulıqlarda 23nçe ğıynvarda piratlar urlağan 15 törek diñgezçese qotqarıldı. Törkiyä tışqı êşlär ministrı Mäwlet Çavuşoğlu alarnıñ xälläreneñ yaxşı buluın citkerde.
Angliyädä urnaşqan “Borealis” şirkäteneñ “Mośart” isemle korabı Nigeriyäneñ Lagos şähärennän Kön’yaq Afrikanıñ Keyptaun şähärenä barğanda piratlar qulına töşä. 19 keşelek êkipajdan 15 diñgezçene urlıylar.
Diñgez banditları belän berençe êlemtä 28nçe ğıynvarda urnaştırıla. Kiçä isä söyeneçle xäbär kilde. Germaniyäneñ Gamburg şähäre aşa alıp barılğan operaśiyä näticäsendä diñgezçelär qotqarıldı. Alar sälamätlek häm qurqınıçsızlıq kontrolen uzğannan soñ Törkiyägä qaytaçaq.