"Awrupa Berlege strategik suqırlıqtan qotılırğa tiyeş"

Törkiyä ilbaşı Räcäp Tayyip Ärdoğan Awrupa Berlegeneñ strategik suqırlıqtan tiz arada qotıluı kiräklegen belderde. Ul Antaliyädä uzğan Könçığış Urta diñgez seminarında videoêlemtä aşa çığış yasadı. İlbaşı fikerençä, Awrupa Greśiyägä berdämlek häm teläktäşlek kürsätü öçen Kipr törekläre häm Törkiyägä qarata ğadelsezlek êşli.

“Könçığış Urta diñgezdä yar buyında urnaşqan barlıq däwlätlär häm Kipr törekläre dä qatnaşaçaq konferenśiyä oyıştıru täq’dimebez äle haman qaralmadı. Äñgämädäşlärebez Törkiyäneñ suzğan qulın kire bormas dip kötäbez. Greśiyä häm Urta diñgezdä kürşebez bulğan barlıq illärne bu mäs’älägä citdi qararğa çaqırabız. Ayıq aqıl häm êçkersezlek belän êş itkändä härkemneñ xoquqların saqlawçı häm mänfäğat’lären yaqlawçı nigez formulasın taba aluıbızğa ışanam,”-di ul.  

Ärdoğan Törkiyäneñ Urta diñgezdä iñ ozın yar buyına iyä buluın häm andağı üzgäreşlärne çittän qarap tora almayaçağın da äytte.

“İlebezneñ Antaliya plyajları belän çiklärgä mataşuçı plan häm kartalarnı qabul itmäyäçägen açıq räweştä belderdek. Berkemneñ dä xaqın häm xoquqların yuqqa çığarırğa telämibez. Bezneñ xaqlarıbıznı qulıbızdan tartıp alırğa mataşuçı piratlarça fikerläwgä qarşı çığabız. İlebez Könçığış Urta diñgez mäs’äläsendä berqayçan da kiyerenkelek tügel, tınıçlıq, ğadellek häm tigez xoquqlılıq urnaşuı yaqlı,”-dip söyläde Törkiyä ilbaşı Räcäp Tayyip Ärdoğan.