Törkiyä ilbaşınıñ Cömhüriyät bäyräme qotlawı

Törkiyä ilbaşı Räcäp Tayyip Ärdoğan 29nçe oktyabr’ cömhüriyät bäyräme uñayınnan yasalğan videoyullamasında Törkiyädä häm çit illärdä yäşäwçe barlıq watandaşlarnı qotladı. Ul bu şatlıqnı urtaqlaşuçı härkemgä çın küneldän räxmäten belderde.

Ärdoğan Cömhüriyät iğ’lan itüneñ 97 yıllığında Bäysezlek suğışınıñ barlıq kaharmannarı häm cömhüriyätne qoruçı gazıy Mostafa Kämal Atatörekneñ xörmät belän iskä alınuın äytte.

İlbaşı Malazgirt ciñüennän başlap bügen bik küp frontta baruçı terrorçılıq belän köräşkä qadär, meñ yıllar buyı watan cirlären saqlaw öçen şähit häm veteran bulğan barlıq kaharmannarnı räxmät belän iskä aldı.

“Bäysezlek suğışı belän idarä itkän, 15nçe iyül’ tönendä tüntäreleşçelärgä qarata kürsätkän şanlı qarşılıq belän tağın ber tapqır gazıy iseme alğan, milli ixtiyarıbıznıñ qodräte Törkiyä Böyek Millät mäclesebezgä xörmätemne citkeräm. Cömhüriyätebezneñ 100   yıllığın söyeneç belän bilgeläp ütärgä äzerlängän çorda 2023nçe yılğa quyılğan maqsatlarıbızğa taba yulıbıznı däwam itäbez.

Törkiyä demokratiyä häm üseş yulında berdänber partiyä diktaturasınnan – tüntäreleşlärgä, wasıyät’kä höcümnän - terrorçılıq belän köräşkä qadär bik küp kirtälärne ütep barğan däwlät. Bu ozın häm awır prośessta yulıbızğa çıqqan qıyınlıqlar millätebezne bäysezlek häm kiläçäge öçen köräştän kiregä bormadı, kiresençä, täwäkkällegen arttırdı,”-dip söyli ilbaşı.

Ärdoğan yullamasında bolay dip däwam itä: “Millätebez Bäysezlek köräşendä cidedän citmeşkä qadär berläşte. Bügen dä ul berlek, berdämlek häm qardäşlek êçendä kiläçägen tözi. Maqsatlarıbızğa yaqınlaşqan sayın ilebezgä qarata höcümnärneñ frontı kiñäyä, sanı häm däräcäse arta. Millätebezdän alğan köç belän diplomatiyä, iq’tisad häm qıymmätlärebezgä qadär suzıluçı bu höcüm dulqının ber-ber artlı kire qağabız. Törkiyäneñ üz ixtıyarı belän xäräkät itüenä êçläre poşuçılarnıñ süzläre häm ğamälläreneñ monnan soñ bernindi ähämiyäte yuq. İlebez, kemneñ närsä diyüenä häm ni qıluına qaramastan, üz yulına, üz plannarına qarap xäräkät itäçäk. Nigez saluçılar bu watannı niçek 7 däwlätneñ plannarın bozıp basıp aludan qotqarğan bulsa, bez dä maqsatlarıbızğa ireşü öçen şulay uq täwäkkäl. Bügen bez, 20 yıl êlekkegä qarağanda, küpkä köçleräk, aqıllıraq häm tuğ’rıraq.

Global’ sistemanıñ bozıqlığın assızıqlawçı “Dön’ya 5tän böyek” çaqıruıbıznıñ qaytawazı torğan sayın kiñäyä. Bez isä duslarıbız belän bergä xıyallarıbızdağı xozurlı häm görläp toruçı kiläçäkkä tağın da zur ömetlär belän barabız. Rabbım teräk häm yärdämçebez bulsın. Şuşı xislär belän tağın ber qat Cömhüriyätebezneñ 97 yıllığı belän täbrik itäm,”-dip söyli Törkiyä ilbaşı Räcäp Tayyip Ärdoğan üzeneñ qotlawında.