Tarrantqa bilgelängän cäza Törkiyäne qanäğat' qaldırdı
Ul Yaña Zelandiyädäge iñ awır cäzağa xökem itelde
1480142
Törkiyä Yaña Zelandiyädä 2 mäçetkä höcüm itep 51 keşene ütergän terrorçı Brenton Tarrantnıñ ğomerlek törmägä xökem itelüenä qanäğat’. Mäxkämä qararınnan soñ tışqı êşlär ministrlığı yazma belderü yasadı. Anda älege terrorçı höcümnärendä Törkiyä watandaşı Zäkäriyä Tuyannıñ da ülüe, tağın ike watandaş – Mostafa Boztaş belän Tämäl Ataçocuğunıñ yaralanuı xäterlätelä.
“Terrorçınıñ Yaña Zelandiyädä iñ awır cäza bulğan häm bernindi yarlıqawdan faydalana almayaçaq ğomerlek törmägä xökem itelüen zur qanäğat’lek belän qarşıladıq. Älege mäxkämä qararı islamofobiya, ksenofobiya, rasaçılıq häm näfrätkä nigezlängän barlıq ideologiyä häm ğamällärgä qarşı xalıqara cämäğat’çelekneñ urtaq köräşe kiräklegen tağın ber qat xäterlätte,”-diyelä belderüdä.
