Ärdoğan Ğosmanlı cirlären kire qaytarırğa telime?

Franśiyäneñ “Le Figaro” gazetı Törkiyä ilbaşı Räcäp Tayyip Ärdoğannı Ğosmanlı padişahı belän çağıştırdı. “Fatix Ärdoğan” isemle mäqalädä yazılğança, anıñ Liviyä xökümäte belän tözelgän xezmättäşlege Berençe Bötendön’ya suğışınnan soñ Ğosmanlı imperatorlığın öleşlärgä bülgän Sevr kileşüen yuqqa çığaraçaq. Ärdoğannıñ padişah Fatix Soltan Mäxmät zamanındağı şikelle êlekkege imperatorlıq köçen çiklärneñ tışına çığaru häm Törkiyägä ğorurlığın kire qaytarırğa teläwe belderelä.

Yazmada Ärdoğannıñ Liviyä xökümäte räise Fayiz äs-Särrac belän Urta diñgez kartasın qabat sızuına iğ’tibar cälep itelä. Anda Särracnıñ, könbatışlı berlektäşläre üzen yalğız qaldırğannan soñ, Törkiyä belän kileşergä mäcbür buluı äytelä.  

Mäqalädä Urta diñgez çikläre mäs’äläseneñ Törkiyä belän Greśiyä arasındağı mönäsäbätlärne distälägän yıllar buyı kiyerenkeläşterüe dä iskä töşerelä. Anda, şulay uq, İlbaşı Ärdoğannıñ Kön’yaq Kipr grek idaräse häm  Meys utrawı sulıqlarında borawlaw êşçänlege alıp baru kürsätmäse birüe turında süz bar. “Könçığış Urta diñgezdäge baylıqlar öçen köräş äle yaña başlana,”-diyelä yazmada.