Ärdoğan 100 yıldan soñ üç alamı?
Franśiyä basması Törkiyä ilbaşınıñ ber ğasır êlek bulğan waqıyğalardan revanş aluın belderä
Franśiyäneñ “Le Monde” gazetı ilbaşı Räcäp Tayyip Ärdoğannıñ “Sevr kileşüe” öçen üç aluın yaza. 1920nçe yılnıñ 10nçı avgustında imzalanğan älege dokument Ğosmanlı cirlären Awrupa illäre arasında büleşüne küzallıy. Franśiyäneñ Sevr şähärendä kileşügä qul quyılğanda padişahlıqnıñ mäydanınıñ kübese Antanta däwlätläre tarafınnan basıp alınğan bula. Töreklärgä anda keçkenä genä cir bülep birelä.
“Le Monde” gazetınıñ “Yöz yıldan soñ Ärdoğannıñ Sevr kileşüennän üç aluı” dip ataluçı xäbärendä Törkiyä ilbaşı häm Liviyä xökümäte räise Fayiz äs-Serracnıñ Tön’yaq Afrika häm Urta diñgezdäge strategik uyınnı üzgärtäçäk onıtılmas kileşü imzalayaçaqları häm monıñ öçen zinnätle häm tarixi nigezle urınğa ixtiyac toyuları belderelä.
Yazmada äytelgänçä, bu nisbättän İstanbuldağı Dolmabahçe sarayı bik urınlı bulaçaq. Ärdoğan belän Serrac biredä 2019nçı yılnıñ noyabrennän 2020nçe yılnıñ fevralenä qadär kileşü belän bäyle räweştä 4 tapqır oçraştı.
Xäbärdä Tripoli xökümäteneñ, Törkiyäneñ Liviyağa xärbi häm logistika yärdämenä cawap itep, Änkaranıñ Urta diñgezneñ könçığışındağı maqsatlarına qarşı çıqmawnı küzdä totuçı diñgez çikläre prinśibın qabul itüe alğa sörelä. Anda Ärdoğannıñ 2019nçı yılnıñ 16nçı dekabrendä Serrac belän Dolmabahçe sarayında ikençe oçraşuın uzdırğannan soñ “Bu xärbi häm ênergetika kileşüe näticäsendä Sevr solıxın bozdıq” dip belderüe xäterlätelä. Şul räweşle, Törkiyä ilbaşınıñ älege kileşüdän revanş aluı farazlana.
Xäbärdä Awrupa Berlege häm AQŞnıñ Süriyädä DEAŞ terrorçıları belän köräşü öçen separatist terrorçı oyışması YPG/PKKğa yärdäm itüe assızıqlana.
Yazmada belderelgänçä, FETOnıñ 2016nçı yılnıñ 15nçe iyül’ tüntäreleş kereşüennän soñ Törkiyä Süriyä çigendä terrorçı oyışma PKKğa qarşı köräşne arttırdı. “Ärdoğan häm unışsız tüntäreleş kereşüennän soñğı çiktän tış uñçı urtaqlarınıñ küzendä mäs’älä yaña Sevr kileşüe tozağınnan qaçu” diyelä anda.
Xäbärdä Ayasofiya-i Käbir mäçeteneñ ğıybadätkä açılu köneneñ oçraqlı bulmawı da äytelä. 24nçe iyül’dä 97 yıl êlek Lozan kileşüe tözelde häm Sevr solıxı belän tartıp alınğan cirlär Törkiyäneke bularaq tanıldı.
