"Bu keşeleksez mentalitetnı ğayeplim"

Törkiyä ilbaşı Räcäp Tayyip Ärdoğan Amerika Quşma Ştatlarında poliŝiya qırıslığı arqasında yaqtı dön’yadan kitkän Djordj Floydnıñ üleme belän bäyle bularaq: “Bu keşeleksez mentalitetnı ğayeplim,” – dide.

Ärdoğan Twitterda ingliz telendä tübändägeçä yazdı: “AQŞnıñ Minneapolis şähärendä Djordj Floydnıñ intekterelep üterelüenä säbäpçe bulğan rasaçı häm faşist totış barıbıznı da borçuğa saldı. Bezgä keşelärne yaratırğa öyrätüçe İslamnıñ äğzase bularaq bu keşeleksez mentalitetnı ğayeplim. Qayda ğına bulsa da, Törkiyä keşelekkä qarşı härtörle höcümgä qarşı buldı.”

Möxämmäd päyğambärneñ “Aq tänle qara tänledän östen tügel, qara tänle dä aq tänledän östen tügel” süzlären xäterlätkän Törkiyä ilbaşı: “Bu nigezdä tös, din, tel yäisä ışanunı ayırmıyça bar keşelek xoquqların saqlaw öçen köräşergä däwam itäçäkbez. Bu keşeleksez ğamälne başqaruçılarnıñ cäzağa tartılaçağına ışanam, mäs’äläne küzätep baraçaqbız. Djordj Floydnı xörmät belän iskä alam, ğailäse häm tuğannarınıñ qayğısın urtaqlaşam,” – dide.