Ärdoğan Putin häm Zelenskiy belän söyläşte

Törkiyä ilbaşı Räcäp Tayyip Ärdoğan Rusiyä däwlät başlığı Vladimir Putin häm Ukraina liderı Vladimir Zelenskiy belän ayırım-ayırım telefonnan söyläşte.

Törkiyä ilbaşı idaräsennän yasalğan belderügä qarağanda, Putin belän äñgämädä koronavirus belän köräştä xezmättäşlek, ikeyaqlı mönäsäbätlär häm regional’ mäs’älälär urtağa quyılğan.

Kreml’neñ matbuğat xezmäte dä älege söyläşü turında belderü yasap, Ärdoğan belän Putinnıñ Kovid-19 kizüe belän bäyle wäzğıyät’ xaqında fiker alışuların häm yoğışlı çir belän köräştä kertelgän çaralar mäs’äläsendä ber-berlärenä mäğ’lümat birüen citkerde.

Anda, şulay uq, Törkiyädäge Rusiyä watandaşlarınıñ öylärenä qayta aluı mäs’äläsendä xezmättäşlek itü dä telgä alındı.   

İke lider İdlib töbägendäge wäzğıyät’ne totrıqlı qılu öçen 5nçe martta tözelgän kileşüne dä kertep Süriyä xaqında külämle fiker alışu yasadı.

Ärdoğan belän Zelenskiynıñ söyläşüenä kilgändä, Törkiyä ilbaşı idaräsennän belderülärençä, ike lider, şulay uq, koronavirus belän köräşü mäs’äläsenä tuqtaldı.

“Ärdoğan Ukrainanıñ Törkiyädän sulış alu cihazı häm saqlawçı kiyem taläben qarap çığaçağın äytte,”-diyelä Ukraina ilbaşı matbuğat üzägennän yasalğan belderüdä.