İdlibtä tağın törek ğaskäriläre hälaq buldı

Süriyädä İdlibneñ tön’yağında Bäşşar Äsäd rejimınıñ artilleriyä utında 5 törek ğaskäriye hälaq buldı, tağın 5se yaralandı. Bu xaqta Törkiyä milli saqlanu ministrlığınıñ matbuğat häm cämäğat’çelek belän mönäsäbätlär idaräsennän belderü yasaldı.

“İdlibtä bäreleşlärne kirtäläw, çik buyı iminlegen saqlaw, migraśiyä häm keşelek faciğalären buldırmıy qalu maqsatı belän cirlekkä östämä köç bularaq cibärelgän xärbilärebezgä rejim tarafınnan 2020nçe yılnıñ 10nçı fevralendä yasalğan köçle artilleriyä utı näticäsendä 5 qaharman suğışçıbız şähit buldı, 5se yaralandı,”-diyelä anda.

Belderüdä äytelgänçä, höcümnän soñ cirlektä açıqlanğan ob’yektlarğa kiçekmästän köçle ut açıp cawap qaytarıldı. “Maqsatlar bilgelände, şähitlärebezneñ qanı cirdä qalmadı, qalmayaçaq ta. Wäzğıyät’ yaqınnan küzätep barıla häm kiräkle çaralar kürelä,”-diyelä anda.

Höcümnän soñ Törkiyä ilbaşı idaräse êlemtä bülege başlığı Fäxretdin Altun Twitter sośial’ media säxifäse aşa belderü yasadı.

“Bu xıyanätçel höcümneñ kürsätmäsen birgän suğış cinayät’çese barı tik Törkiyäne tügel, xalıqara cämäğat’çelekne tulayım nişanğa aldı. Dön’yanıñ här cirendä tınıçlıq häm totrıqlılıq öçen êşlägän qaharman Törek qorallı köçläre bayrağıbızğa suzılğan qullarnı sındırıp, dusqa - ışanıç birüen, doşmanğa qurqu çäçüen däwam itä,”-dide ul.